«Առաջին լրատվական»-ը զրուցել է վերածնված ՀՀՇ-ի նախաձեռնողներից Հովհաննես Իգիթյանի հետ:
– Պարոն Իգիթյան, սեպտեմբերի 3-ից հետո Հայաստանի արտաքին քաղաքականության վեկտորի փոփոխություն է տեղի ունեցել, արդյո՞ք կկարողանա նորաստեղծ կուսակցությունը ազդել այս գործընթացների վրա:
– Ձեր հարցի մեջ արդեն պատասխանը կար: Իրոք, կտրուկ շրջադարձ է կատարվել Հայաստանի զարգացման ռազմավարական ուղուց, և մենք պետք է փորձենք դա հասկանալ և ներկայացնել: Հայաստանում այսօր կա այն կուսակցությունների պակաս, որոնք հանրությանը կարող են պարզ բացատրել, թե ինչ է տեղի ունենում: Եվ եթե նայեք, որոշ ընդդիմադիր ուժեր կաշկանդված են քննադատորեն խոսել ՄՄ-ին Հայաստանի միանալու հայտի դեմ, և կիսաակնարկներով ասում են, որ այստեղ ԼՂՀ հարց կա:
– Պարոն Իգիթյան, շատ է խոսվում քաղաքական նոր ուժի ձևավորման անհրաժեշտության մասին, որի զարգացման հեռանկարները կապված կլինեն ոչ թե ՄՄ, այլ ԵՄ հետ: Կարծում եք` ՀՀՇ-ի՞ միջոցով, թե՞ այնուամենայնիվ, նոր ուժ կձևավորվի:
– Անկեղծ ասած, ես չեմ կարծում, որ մենք պետք է պայքարենք ՄՄ դեմ: Մենք ունենք մեր տեսակետը Հայաստանի մոդելի մասին և եթե մեր՝ սոցիալական, տնտեսական, քաղաքական մոդելի գոնե 50 տոկոսը իրականանա, Հայաստանը չի տեղավորվելու ՄՄ շարքերում: Օրինակ՝ Շվեյցարիան, Լյուքսեմբուրգը կամ Հարավային Կորեան վերցրեք, նրանք ստեղծել են ազատ շուկայական հարաբերությունների ուղին, այս երկրներին Պուտինը չի դիմում ՄՄ անդամակցելու համար, այդ հարցը օրակարգում չկա, իրենք չեն տեղավորվում ՄՄ չափանիշների մեջ: Եվ մենք այնպիսի մի երկիր պետք է ստեղծենք, որ Պուտինի մտքով չանցնի, որ մենք Ղրղըզստանի կամ Բելառուսի մակարդակի երկիր ենք ժողովրդավարության զարգացման տեսակետից, որ գա ճնշի և բերի ՄՄ: Մենք ուշացել ենք այդ հարցում, բայց երբեք էլ ուշ չէ: Մենք պետք է այնպիսի երկիր լինենք, որ չլինելով ԵՄ անդամ, համահունչ լինենք այն արժեքային համակարգին, որն առկա է ԵՄ անդամ երկրներում:
Հարցազրույցն ամբողջությամբ` տեսանյութում:
