«Հայաստանի իշխանությունները, մեծ խոցելիություն ունենալով, տրվում են ամեն տեսակ ճնշմանը, ըստ էության՝ սեպտեմբերի 3-ից հետո արդեն տեղի են ունենում գործընթացներ, որոնք ոչ մի կերպ Հայաստանի օգտին չեն»,- «Առաջին լրատվական»-ի հետ զրույցում ասաց «Ժառանգություն» կուսակցության փոխնախագահ Արմեն Մարտիրոսյանը՝ հավելելով, որ այդ գործընթացներից մեկը Եվրախորհրդարանի հայտարարությունն էր: «Այն իր մեջ ներառում է ՄԱԿ-ի չորս բանաձևերը՝ «օկուպացված տարածքներ» արտահայտությամբ, որը երկար ժամանակ եվրոպական որևէ ատյանում չէր եղել»,-ընդգծեց Մարտիրոսյանը:
Նրա խոսքով՝ սրանք ծաղիկներն են հետագայի այն սպասումների, որ կարող են լինել Եվրոպայի կողմից Հայաստանի նկատմամբ․«Բացի այդ, Եվրամիությունը կարծես թե Թուրքիայի հետ ուզում է վերսկսել բանակցությունները՝ ԵՄ-ի մեջ Թուրքիայի անդամակցության վերաբերյալ: Դրան զուգահեռ՝ Լուկաշենկոն և Նազարբաևը հայտարարում են այն մասին, որ Հայաստանը ոչ այս, ոչ էլ մյուս տարի չի կարող լինել Մաքսային միության անդամ: Նազարբաևը խոսում է Թուրքիայի անդամակցության մասին, Լուկաշենկոն ավելի ծանր խոսքեր ասաց հանդիպումից առաջ, որ Ադրբեջանի հետ կապված՝ Հայաստանը տարածքային վեճ ունի, և այդ վեճը պետք է լուծվի»:
Արմեն Մարտիրոսյանի խոսքով՝ Հայաստանն իրեն մտցնում է մի միության կազմի մեջ, որտեղ Ռուսաստանը բազմամիլիարդանոց զենքի առևտուր է անում Ադրբեջանի հետ, Ղազախստանը ճանաչում է նրա տարածքային ամբողջականությունը և պահանջ է դնում Ղարաբաղի մաքսակետերի հետ կապված, Բելառուսը ևս որոշակիորեն պաշտպանում է Ադրբեջանի շահերը. «Ընդ որում, տեսնում ենք, որ հարվածներ արդեն երկու կողմից լինելու են, որովհետև այն մի տեղում այլևս հուսալի գործընկեր չէ, ինչպես ասաց Շտեֆան Ֆյուլեն: Լեհաստանի արտգործնախարարը մի քանի օր առաջ դիվանագիտորեն փափուկ, բայց բովանդակային կոպիտ հայտարարություն արեց Հայաստանի՝ ճնշումներին տրվելու հետ կապված: Իսկ ԵվրԱզԷսի պետություններն էլ քանի որ տեղյակ են, թե ինչ պայմաններում է այդ ամենը տեղի ունեցել, բնականաբար… այսպես ասեմ՝ հայկական դեմքը հարգանքն է կորցրել»:
Մեր զրուցակիցը նշեց, որ երևի թե դա է պատճառը, որ երբ Մոսկվայում եկեղեցի բացվեց, որևէ պաշտոնական ներկայացուցիչ այդ բացմանը չկար:
Հարցին, թե փաստորեն իր կարծիքով՝ այսուհետ ճնշումներ են լինելու նաև Եվրոպա՞յի կողմից, Արմեն Մարտիրոսյանը պատասխանեց․ «Բնականաբար, այդպես էլ պետք է լինի, Եվրոպան հսկայական ժամանակ է ծախսել Հայաստանի վրա, նյութական ռեսուրսներ, էլ չեմ ասում քաղաքական, այսպես ասեմ, աջակցությունն է հայտնել կեղծված ընտրություններին, կառավարման համակարգին, ուստի և պարզ է՝ երբ Հայաստանը բառիս բուն իմաստով խաբեց Եվրոպային, այսպես էլ պետք է լիներ:
Իշխանություններին այս ծայրահեղ վիճակում միայն ֆինանսական ներհոսք և ընտրություններին աջակցություն էր պետք, և այս ամենը ստանալուց հետո, երբ Եվրոպային Հայաստանը «գցեց», բնականաբար, արդեն պատասխան ռեակցիան կամաց-կամաց լինելու է, որքան էլ ասեն՝ նմանատիպ բաներ չեն կարող լինել, ես կասեմ՝ ո՛չ, լինելու է»:
Նախկին պատգամավորը հավելեց, որ միայն մի դեպքում կարող է բացառել դա, այն է՝ եթե Հայաստանը կարճ ժամանակ հետո նորից վերադառնա Ասոցացման պայմանագրի շրջանակ: «Հակառակ պարագայում, ես կարծում եմ, որ այդ գործընթացները շարունակվելու են»,- եզրափակեց Ա․ Մարտիրոսյանը:
Լուսանկարը՝ Photolure-ի