«Ղարաբաղ» կոմիտեի անդամ Աշոտ Մանուչարյանը կարծում է, որ ԵՄ-ն, որտեղ մտնում է հակառուսականության ալիքը, բարձրանում է։ «Առաջին լրատվական»-ի հետ զրույցում նա ընդգծեց, որ նոր իրավիճակում, երբ ԵՄ-ի հետ համաձայնագիր է ստորագրվել, Հայաստանը կարող է դառնալ կա՛մ առճակտման, կա՛մ համադրման վայր։
«Մեզ համար շատ վտանգավոր է թույլ տալ, որ այդ վաշխառուական համակարգը, որը գործում էր մինչև այսօր, այդ անձինք, այդ կուսակցությունները գործեն. նրանք դառնում են ծայրաստիճան վտանգավոր, որովհետև նրանց միջոցով իրականացվելու է առճակատումը։ Մենք չենք կարող թույլ տալ, որ Հայաստանը դառնա առճակատման վայր, հետևաբար հիմա, երբ ստեղծվել է այս նոր իրավիճակը, իրոք հեռանկար կա, և՝ դրական: Այսինքն՝ Հայաստանը պետք է կարողանա շոշափել հնարավորություններ իրական, խորքային Եվրոպայի հետ և կարողանա կամուրջներ հաստատել թե՛ ՌԴ-ի, թե՛ ընդհանրապես հետխորհրդային տարածքի, Եվրոպայի միջև, մյուս կողմից՝ Մերձավոր Արևելքի, Իրանի հետ. այստեղ էլ շատ կարևոր բոլոր տեղերում ներկայացված ենք: Եվ հայությունը շատ էֆեկտիվ է և՛ այնտեղ, և այնտեղ: Բայց Հայաստանի իշխող համակարգը հայության ամբողջականության գործում ոչինչ չի արել, հակառակը՝ բզկտել է և հանձնել այդ օղակները այլևայլ երկրների։
Եթե կարողանանք հիմա հայության ամբողջականության խնդիրը լուծել և վաշխառուական որակները հաղթահարելով՝ Հայաստանում էլ կենտրոնացնենք այն ուժերը, որոնք իրական հայկական քաղաքականություն կվարեն, այդ դեպքում իրոք կդառնանք համադրման համակարգ: Ոչ թե առճակատման վայր կդառնանք, այլ համագործակցության վայր, խողովակ կդառնանք, կդառնանք մեծ Մխիթարյաններ։ Բայց այսօրվա որակով իշխանությունները ոչ մի կապ չունեն Հայաստանի, հայ ժողովրդի հետ և ամեն վայրկյան պատրաստ են կատարել արտաքին ցանկացած հանձնարարական, մենակ թե իրենց բան չպատահի: Մարտի մեկը արել են այս իշխանությունները, ցանկացած հազար այլ բան արել են այս իշխանությունները»,- շեշտեց նա։
Աշոտ Մանուչարյանի խոսքով՝ հայ մարդը միշտ եղել է Եվրոպայի հետ խորքային կապերի մեջ՝ Մոցարտի, Հեգելի, Բախի Եվրոպայի հետ, բայց ԵՄ-ն վաշխառուական կապիտալի համակարգ է, որը ներառում է թե՛ եվրոպական, թե՛ ոչ եվրոպական արժեքներ: Պետք է կարողանալ զգուշանալ վտանգներից, օգտվել հնարավորություններից։ Ըստ նրա՝ ԵՄ-ն Եվրոպան քանդողն է, պետք է միանալ փրկողների հետ։
Մանրամասները՝ տեսանյութում:
