Ինքնիշխանություն զիջելով՝ ձեռք ենք բերում այլոց զիջած ինքնիշխանությունը. Գագիկ Մելիքյան

ՀՀ ԱԺ «Ելք» խմբակցության հեղինակած «ՀՀ մասով Եվրասիական տնտեսական միության պայմանագրի գործողությունը դադարեցնելու գործընթաց սկսելու վերաբերյալ» ԱԺ հայտարարության նախագծի վերաբերյալ խորհրդարանական լսումներին այսօր ՀՀԿ խմբակցության քարտուղար Գագիկ Մելիքյանն իր ելույթում նշեց, որ պետք չէ հանուն ՀՀ գնալ ինքնակործանման. «ԵՄ-ն ինքը ընդունում է ԵՏՄ-ն, մենք ո՞վ ենք, որ չընդունենք: Ինչո՞ւ մենք պետք է դրանից հրաժարվենք: Սա մեր կռիվը չէ, այլ գլոբալ աշխարհի կռիվն է, ու մենք մեր դիրքերը պետք է օգտագործենք՝ ի շահ մեր պետականության ու օգտվենք՝ որքան կարող ենք: Բերեք չքննադատենք, այլ աշխատենք: Ասում եք՝ ծիրանի արտահանումը նվազել է, բայց մոռանում ենք, որ արտադրությունն է նվազել: Եկեք բանավիճենք, սակայն մեր շահերից ելնելով՝ չխեղաթյուրենք փաստերը, այլապես դա դառնում է արեւելյան բազար: Այո, պարտավորություններ ստանձնելով, մենք գնում ենք ինքնիշխանության որոշակի զիջման, սակայն ձեռք ենք բերում անդամ այլ պետությունների զիջած ինքնիշխանությունները»: