Կարծում եմ՝ տոնավաճառների առևտրականներին հետապնդելու հետևում կա լատենտ գործունեություն, այսինքն՝ նպատակը թաքցված է։ Այդ մասին «Առաջին լրատվական»-ի հետ զրույցում նշել է «Ծառուկյան» խմբակցության պատգամավոր Սերգեյ Բագրատյանը՝ անդրադառնալով ԱԺ-ի շենքի մոտ «Առինջ մոլի» առևտրականների բողոքի ակցիային։
Նրա խոսքերով՝ 2017 թվականի ապրիլից «Առինջ մոլի» բոլոր տնտեսվարողները անընդհատ դիմում են հասարակական կազմակերպություններին, կառավարությանը, բարձրաձայնում են իրենց խնդիրները, սակայն լուծում չեն ստանում։
«Այդ մարդիկ հանապազօրյա հաց վաստակելու խնդիր են լուծում։ Շատ երկրներում նման գործունեություն ծավալողներն ազատված են հարկային պարտավորություններից։ Հիմա մենք ինչո՞ւ ենք այդ մարդկանց անհանգստություն պատճառում։ Կարծում եմ՝ այդտեղ կա լատենտ գործունեություն, այսինքն՝ նպատակը թաքցված է։ Կարծում եմ, ինչ-որ մարդիկ փորձում են այդ մարդկանց այլ տեղ ուղղորդել։ Համենայնդեպս, տպավորությունն այդպիսին է։ Այլապես հասկանալի չէ, որ մարդը, որն արդեն սահմանին իր հարկային պարտավորությունները կատարել է, հետևել այդ մարդուն, անընդհատ ստուգել գնորդների պայուսակները։ Պատկերացրեք, մենք գնում ենք կատարում, հետո պարտադրում են պայուսակը բացել և ասել, թե ինչ ենք գնել, որտեղից ենք ձեռք բերել, ինչ գնով։ Բնականաբար, մենք չենք ցանկանա առևտուր անել այդտեղից։ Այսինքն՝ մտածված փորձում են այդ մարդկանց իրացման հնարավորությունները զրոյացնել։ Բացի այդ, նպատակային, թիրախային անընդհատ հարկային նոր պարտավորությունների խնդիր են դնում՝ չունենալով նման իրավասություն»,- ընդգծեց «Ծառուկյան» խմբակցության պատգամավորը։
Ամբողջությամբ՝ տեսանյութում:
