ԱՄՆ Կոնգրեսի անդամները մտադիր են սահմանափակել նախկին նախագահների թոշակի չափը՝ տարեկան մինչև 200 հազար դոլար: Այս մասին գրում է The Washington Examiner-ը՝ հստակեցնելով, որ այժմ 5 նախկին նախագահները ստանում են մոտ 205 հազար դոլար:
Ըստ այդմ՝ Կոնգրեսի Ներկայացուցիչների պալատը հաջորդ շաբաթ կքվեարկի համապատասխան օրինագծի հարցով, որի նախաձեռնողը հանրապետական կոնգրեսական Ջոդի Հայսն է: «Արդարացի կլինի նվազեցնել նախկին նախագահների՝ հարկատուների կողմից տրվող ֆինանսական աջակցությունը: Նրանք ուղղակի նման օգնության կարիք չունեն»,- նրա խոսքերն է մեջբերում թերթը:
Հոկտեմբերին համանման օրինագծին հավանություն էր տվել Սենատի՝ ազգային անվտանգության հարցով կոմիտեն:
Բացի թոշակի չափի կրճատումից՝ օրինագիծը նախատեսում է նվազեցնել նաև գրասենյակների վարձավճարների համար նախկին նախագահներին տրվող գումարը՝ տարեկան մինչև 500 հազար դոլար, ինչպես նաև նրանց օգնականների աշխատավարձը:
Նախատեսվում է նաև մեխանիկորեն կրճատել նախկին նախագահների նպաստները, եթե նրանց հավելյալ եկամուտը գերազանցում է տարեկան 400 հազար դոլարը:
