Օձունի խոշորացված համայնքի ղեկավարի թեկնածու, անկուսակցական Բարսեղ Այվազյանը միավորված 8 գյուղերում երեկ տեղի ունեցած քվեարկության արդյունքներն անվավեր ճանաչելու և վերահաշվարկի պահանջով դիմել է թիվ 25 ԸԸՀ։ Օձունի գործող գյուղապետ Արսեն Տիտանյանից ընդամենը 33 ձայնի տարբերությամբ պարտություն կրած թեկնածուն դժգոհ է արդյունքներից։ Այդ մասին հաղորդում է «Ազատություն» ռադիոկայանը։
«Ընտրությունների ընթացքում ընդհանուր լարումներ չեն եղել, նորմալ ա եղել, ոչ մի խոչընդոտներ չի եղել։ Խախտումներ եղել ա, թեթև միջադեպ եղել ա, բայց դա կպարզվի վերահաշվարկից հետո»,- ասաց Բարսեղ Այվազյանը։ Նրա հիմնական մրցակիցը՝ Արսեն Տիտանյանը համաձայն չէ, թե տեղամասերում խախտումները հնարավոր էին։
«Չգիտեմ՝ ինչի մասին ա խոսքը, բայց եթե խնդիր լիներ, չեմ կարծում, որ հանձնաժողովի որևէ անդամ կստորագրեր, որովհետև մի հանձնաժողովը եղել ա ԲՀԿ-ից, մեկը «Ելք»-ից, մյուսը՝ Հանրապետական կուսակցությունից»,- ասաց Տիտանյանը։ Վերահաշվարկի պահանջով թեկնածուի դիմումը հանձնաժողովում կքննարկվի առաջիկա 4 օրերի ընթացքում։
