Այն, որ մամուլում քաղաքական օրակարգ է դարձել ոչ թե բյուջե 2018-ը, այլ Ռուզաննա Խաչատրյանի գրառումը, դա խոսում է մեր դժբախտության մասին։ Այդ մասին «Առաջին լրատվական»-ի հետ զրույցում ասաց «Ժառանգություն» կուսակցության փոխնախագահ Արմեն Մարտիրոսյանը։ Նրա դիտարկմամբ՝ բյուջեն քննարկվում է կիսադատարկ սենյակում, որտեղ բացակայում են անգամ գլխադասային հանձնաժողովների անդամները։
«Դա նշանակում է, որ բյուջեն մեր առօրյա կյանքի հետ կապ չունի, քաղաքական օրակարգ, ըստ էության, գոյություն չունի, բոլոր զարգացած ժողովրդավար երկրներում բյուջեն թիվ մեկ քաղաքական օրակարգն է, բայց քանի որ մենք ո՛չ զարգացած ենք, ո՛չ ժողովրդավարական ենք, բյուջեի նշանակությունը հանրային կյանքում, կարելի է ասել, զրոյանում է։ Դրա վառ ապացույցն այն քննարկումների ծավալն է, որը հիմա տեղի է ունենում։ Ակնհայտորեն դա ունի նաև մի շարք այլ պատճառներ, պատճառներից մեկն այն է, որ մեր բյուջեն 2008թ-ի ճգնաժամից հետո չի զարգանում, 10 տարուց ավելի է Սերժ Սարգսյանը նախագահ է, և բյուջեն չի ավելանում․ եթե այսօրվա դոլարային կուրսով հաշվենք՝ 2․7 մլրդ դոլարին մոտ բյուջե է, նույնիսկ ամաչելու թիվ է։ 10 տարվա ընթացքում 3 միլիարդի շեմը չենք կարողանում հարթել։ Դա խայտառակություն է։ Քաղաքական առումով էլ ակնհայտ է, որ կարծես թե Կարեն Կարապետյանը չէ այն անձը, որը հետագայում այդ բյուջեն կյաքի է կոչելու, պատասխանատվության առումով չկա այն անձը, որից հետագայում պետք է պատասխաններ ստանալ»,- շեշտեց նա։
Անդրադառնալով նախկին պաշտպանության նախարարի տիկնոջ գրառմանը, Արմեն Մարտիրոսյանն ասաց, որ չի կիսում այն տեսակետները, թե Սեյրան Օհանյանը սրանով քաղաքական խնդիր է լուծում, որպեսզի 2018-ին ընդառաջ ակտիվանա։
«Շատ լավ ճանաչելով արդեն Սեյրան Օհանյան անձին, ես գիտեմ, որ շատ հրապարակային իր մոտեցումները կարողանում է ցուցաբերել, եթե ակտիվանալու ցանակություն ունենա, դրա մասին ինքը կհայտարարի, և որևէ մեկի, այդ թվում՝ իր կնոջ շուրթերով, գրառումներով դա չի բարձրաձայնի»,- շեշտեց նա։
Անդրադառնալով հարցին՝ արդյո՞ք Սեյրան Օհանյանի հետ «Ժառանգության» առաջնորդ Րաֆֆի Հովհաննիսյանն օրերս հանդիպել է, թե՞ ոչ, Արմեն Մարտիրոսյանն ասաց, որ չի կարող ասել, տեղյակ չէ։ Ինչ վերաբերում է հարցին՝ արդյո՞ք կլինի Հովհաննիսյան-Օհանյան-Օսկանյան վերամիավորում, ապա այդ մասին ևս չի կարող ասել։
Մանրամասները՝ տեսանյութում։
