«Շատ-շատերը կցանկանան, որ ղարաբաղյան հարցը շուտ հանգուցալուծում ստանա և որքան շուտ, այնքան լավ։ Նույն Սերժ Սարգսյանը բազմիցս հայտարարել է, որ այդ հանգուցալուծումը լինի այն, որ Ղարաբաղը լինի Ադրբեջանի կազմից դուրս, երաշխավորվի նրա անվտանգությունը և երրորդը, որ ունենա ցամաքային կապ մայր հայրենիքի՝ Հայաստանի հետ։ Այս լուծումը ենթադրում է փոխզիջումներ՝ Ադրբեջանն ընդունի այդ երեք պայմանները, և դրա դիմաց նորմալ է, որ զիջումներ լինեն նաև մեր կողմից»,- «Առաջին լրատվական»-ի հետ զրույցում անդրադառնալով «Անդրանիկ Մարգարյան» քաղաքական դպրոցում հնչեցրած Սերժ Սարգսյանի ելույթին, ասաց ԳԽ պատգամավոր Վիգեն Խաչատրյանը։
Հիշեցնենք, որ Սարգսյանը հայտարարել է, որ Արցախի հարցում հնարավոր են ցավոտ լուծումներ, և որ ղարաբաղյան հիմնահարցը չի կարող կարգավորվել առանց փոխզիջումների։
Մեր զրուցակիցը նաև նշում է, որ եթե իր նշած երեք պայմանները կյանքի կոչվեն՝ «ոչ մի թիզ հող» կարգախոսն ալևս չի աշխատի, և հասարակությունը նման լուծումով բավարարված կլինի։ «Մեր խնդիրը տարածքներ մեծացնելը չէր, մեր խնդիրն էր ճանաչել Արցախի ժողովրդի ինքնորոշման իրավունքը։ Որոշ տարածքների զիջման դիմաց՝ անկախություն, անվտանգություն և ցամաքային կապ հայրենիքի հետ ստանալը նորմալ է։ Ես կրկնում եմ՝ ինքս լավատես չեմ, որ այդ սկզբունքները կյանքի կկոչվեն, բայց եթե լինի՝ «ոչ մի թիզ հողը» չի աշխատի, և շատ մարդիկ այդ հարցադրումից կհրաժարվեն»,- ասաց Խաչատրյանը։
Հարցազրույցն ամբողջությամբ՝ տեսանյութում։
