Անգլիայի Պրեմիեր լիգայի 9-րդ տուրում «Հադերսֆիլդից» կրած սենսացիոն պարտությունից հետո «Մանչեսթեր Յունայթեդը» երեկ վստահ հաղթանակ տարավ՝ ցուցադրելով դիտարժան խաղ: Անգլիայի Լիգայի գավաթի խաղարկության քառորդ եզրափակչում Ժոզե Մոուրինյոյի թիմը մրցակցի հարկի տակ 2:0 հաշվով առավելության հասավ «Սուոնսիի» նկատմամբ: Ու չնայած բրիտանացի բազմաթիվ վերլուծաբաններ կանխատեսել էին, որ այս խաղում «Յունայթեդի» մեկնարկային կազմում կլինի Հենրիխ Մխիթարյանը, մեր ֆուտբոլիստը պահեստայինների շարքում էր և նույնիսկ փոխարինման դուրս չեկավ:
Մոուրինյոն «Սուոնսիի» դեմ ընտրել էր ընդգծված հարձակողական մարտավարություն: Մասնավորապես, հյուրերը ընթացիկ մրցաշրջանում առաջին անգամ խաղացին 3-4-1-2 մարտավարությամբ: Երկու հարձակվողների թիկունքից խաղաց Ջեսի Լինգարդը, որը դուբլ ձևակերպելով՝ դարձավ հանդիպման հերոսը:
Նշենք, որ ենթահարձակվողի դիրքում ընթացիկ մրցաշրջանում սովորաբար խաղում էր Մխիթարյանը: Ըստ էության «Յունայթեդի» մի քանի անհաջող հանդիպումներից հետո Մոուրինյոն գնաց ինչ-որ տեղ կտրուկ փոփոխության, որն արդարացրեց իրեն: «Լինգարդը գործեց ազատ՝ ցուցադրելով գերազանց ֆուտբոլ: Մենք ամեն ինչ արեցինք, որպեզի թիկունքից ամուր աջակցություն ցույց տանք նրան: Կիսապաշտպանության կենտրոնում հաջող գործեցին փորձառու Էրերան և երիտասարդ Մաքտոմինին: Արդյունքը եղավ այն, որ Լինգարդը ներուժը կենտրոնացրեց հարձակողական գործողությունների վրա: Ընդհանուր առմամբ դինամիկ ֆուտբոլ ցուցադրեցինք: Մենք ամեն ինչ արեցինք, որպեսզի պահպանենք մեր գավաթը: Տղաները նվիրված խաղացին և արժանի հաղթանակի հասան»,- հետխաղյա մամուլի ասուլիսի ժամանակ ասել է Ժոզե Մոուրինյոն:
Վերջինիս խոսքերից կարելի է ենթադրել, որ պորտուգալացի մասնագետը լուրջ քայլեր էր ձեռնարկել և տակտիկական փոփոխություններ կատարել, որպեսզի Լինգարդը աչքի ընկնի: Բրիտանական մամուլը արդեն իսկ գրում է այն մասին, որ «Սուոնսիի» դեմ մրցավեճում Լինգարդն ապացուցեց, որ արժանի է խաղալ ենթահարձակվողի դիրքում:
Հիշեցնենք, որ երեկ բրիտանական մամուլում հրապարակումներ եղան այն մասին, որ Հենրիխ Մխիթարյանն ուղղակի անարգել է Ժոզե Մոուրինյոյին՝ ՖԻՖԱ-ի կողմից անցկացված աշխարհի լավագույն մարզչի ընտրության ժամանակ չքվեարկելով պորտուգալացի մասնագետի օգտին: «Մոուրինյոյի գլխավորությամբ «Յունայթեդը» 3 տիտղոս է նվաճել, այդ թվում նաև Եվրոպա լիգայի խաղարկության գավաթը: Այնուամենայնիվ, Մխիթարյանը քվեարկել է Զիդանի օգտին՝ այդ կերպ անարգելով պորտուգալացի մասնագետին»,- գրված էր Metro պարբերականում:
Հիշեցնենք, որ Տարվա մարզիչ անվանակարգում Մխիթարյանն առաջին հորիզոնականում նշել է «Ռեալի» գլխավորող Զինեդին Զիդանին: Մեր ֆուտբոլիստը երկրորդ հորիզոնականում նշել է «Յուվենթուսի» գլխավոր մարզիչ Մասիմիլիանո Ալեգրիին, իսկ երրորդ տեղում՝ «Մոնակոյի» գլխավոր մարզիչ Լեոնարդո Ժարդիմին:
Երեկվա հրապարակումից անմիջապես հետո Մխիթարյանը չկար «Մանչեսթեր Յունայթեդի» մեկնարկային կազմում և նույնիսկ փոխարինման դուրս չեկավ: Բնականաբար, շատերը կարծում են, որ Մոուրինյոն, գովաբանելով Լինգարդին և չխաղացնելով Մխիթարյանին, վրեժխնդիր է լինում հայ ֆուտբոլիստից: Դժվար է ասել՝ այս դիտարկումը համապատասխանո՞ւմ է իրականությանը, թե՞ ոչ:
«Յունայթեդի» մեկնարկային կազմում տեղ չէին գտել հիմնական կազմի ֆուտբոլիստներ Ռոմելու Լուկակուն, Նեմանյա Մատիչը: Այս ֆուտբոլիստները, սակայն, երկրորդ կեսում խաղաժամանակ ստացան:
Հոկտեմբերի 28-ին Անգլիայի Պրեմիեր լիգայի 10-րդ տուրի շրջանակներում «Մանչեսթեր Յունայթեդը» սեփական հարկի տակ մրցելու է «Տոտենհեմի» հետ: Մխիթարյանին «Սուոնսիի» դեմ չխաղացնելը շատ հնարավոր է պայմանավորված լինի հենց առաջիկա սկզբունքային խաղով: Մոուրինյոն կարևորագույն խաղից առաջ հանգստանալու հնարավորություն է տվել մեր ֆուտբոլիստին:
Նկատենք, որ «Սոունսիի» դեմ «Յունայթեդը» հաջողության հասավ հանդիպման սկզբնամասում և վերահսկում էր հանդիպման ընթացքը: Այլ կերպ ասած՝ Մխիթարյանին խաղադաշտ դուրս բերելու անհրաժեշտություն կարծես թե չկար: Եթե «Տոտենհեմի» հետ խաղում էլ մեր ֆուտբոլիստը չլինի հիմնական կազմում, ապա Մոուրինյոյի՝ Մխիթարյանից, այսպես ասած, նեղանալու պնդումներն ավելի հավանական կլինեն:
