«Հոգևոր Հայաստան»-ը հայտարարություն է տարածել, որտեղ նշված է, որ աշխարհաքաղաքական ահագնացող մարտահրավերների պայմաններում երկրի ներսում շարունակվող քաղաքական, տնտեսական, հոգևոր-բարոյական աննախադեպ անկումը մեծապես վտանգում է պետականության հիմքերն ու հայոց ապագան։ «Լռելն այլևս աններելի է, հապաղելը՝ կործանարար, համակերպվելը՝ դավաճանություն։ Սթափվի՛ր, Հայ մարդ… Արձագանքի՛ր… Տեր կանգնիր վտանգված հայրենիքիդ»,- նշված է հայտարարության մեջ:
Երգիչ-երգահան, «Հոգևոր Հայաստան» նախաձեռնության անդամ Եղիշե Պետրոսյանն «Առաջին լրատվական»-ի հետ զրույցում, պատասխանելով հարցին՝ արդյո՞ք «Հոգևոր Հայաստան» նախաձեռնությունն ակնկալում է, որ հանրությունը կարձագանքի այս հայտարարությանը, նշեց. «Անգամ եթե աջակցություն չլինի, ի՞նչ, ձևանալ, թե ոչինչ չի՞ կատարվում»: «Եթե դու կանխազգում ես վտանգը և քո շփումներում քեզ նման մտահոգ մարդկանց շրջապատում, նաև մամուլում, բոլորի մոտ այդ ահագնացող կանխազգացումն է ինչ-որ վտանգի: Եվ ի՞նչ անես, ձևացնես, թե մեզ մոտ ոչինչ չի պատահել, չահազանգե՞ս դրա մասին»,- ասաց նա՝ հավելելով, որ բոլոր ասպարեզներում անկում է, և ամենավտանգավոր անկումը բարոյական անկումն է, չկա կամք, իմաստնություն չկա, արժանապատվություն չկա: Նրա խոսքերով՝ դեգրադացված, ոչնչի ընդունակ հասարակությունով մենք ի՞նչ ենք անելու, անընդհատ գնում են, այս աշխարհագրական տարածքն ո՞ւմ է մնալու:
Եղիշե Պետրոսյանը նշեց, որ ռուսահայությունը մեր ինքնիշխանության համար ամենավտանգավոր Սփյուռքն է: Ռուսահայությունը մեր աքիլլեսյան գարշապարն է, իսկ Ռուսաստանն էլ մեզ համար լուրջ պրոբլեմ է:
Հարցազրույցն ամբողջությամբ՝ տեսանյութում:
