Apple ընկերությունն ամենամյա Apple Worldwide Developers Conference կոնֆերանսի ժամանակ ներկայացրել է իր նորարարությունները: Կոնֆերանսը բացել է անձամբ Սթիվ Ջոբսը, որը, չնայած ծանր հիվանդությանը և դրանով պայմանավորված երկարատև արձակուրդին, ներկա է գտնվել դրան և ներկայացրել ընկերության ամենասպասված ծառայությունը՝ iCloud-ը: Այս մասին հաղորդում է Associated Press գործակալությունը:
iCloud-ը թույլ է տալիս ընկերության սերվերներին պահել ցանկացած տեղեկություն և ավտոմատ կերպով օգտագործել դրանք ցանկացած ժամի ցանկացած վայրից, ուր էլ գտնվի տվյալ տեղեկության սեփականատերը: iCloud-ը գործում է Apple-ի կողմից արտադրված բոլոր սարքերում՝ iPhone հեռախոսներում և iPad պլանշետային համակարգիչներում: Ջոբսն ասել է, որ այս ծառայությունը փոխարինելու է ոչ այնքան հաջող Apple MobileMe նմանատիպ ծառայությանը, որն արժեր 99 դոլար, իսկ iCloud-ն անվճար է:
Apple-ը նաև ներկայացրել է համակարգիչների և նոութբուքերի համար նախատեսված Mac OS X 10.7 Lion օպերացիոն համակարգը, որը հուլիս ամսից հասանելի կլինի օգտատերերին և կարժենա 30 դոլար: Քայլ է արվել մոտեցնելու նոութբուքերն ու պլանշետային համակարգիչները: Թարմացվել են նաև iPad և iPhone սարքավորումների համար նախատեսված օպերացիոն համակարգերը:
Ամենակարևոր հայտարարություններից մեկը, որ արվել է կոնֆերանսի ժամանակ, այն էր, որ ընկերությունը սերտ համագործակցություն է հաստատում Twitter միկրոբլոգների կայքի հետ, այնպես որ նկարները հատուկ հավելվածի միջոցով հնարավոր կլինի անմիջապես վերբեռնել այդ սոցցանցում:
