Որդուս գլխի շրջանում ծանր վիրավորում հասցրած լեյտենանտը ոչ միայն ազատության մեջ է, այլ շարունակում է ծառայել բանակում, իրականացնում է մարտական հերթապահություն, իսկ իմ որդին հիմա էլ հիվանդանոցում է: Այդ մասին «Առաջին լրատվական»-ի հետ զրույցում ասաց 2016թ-ի հունիսին գլխի շրջանում ծանր վիրավորում ստացած ժամկետային զինծառայող Ալբերտ Դալլաքյանի մայրը՝ Արմինե Ղազարյանը: Հիշեցնենք, որ ըստ քրեական գործի նյութերի, պարզվել էր, որ դասակի հրամանատար՝ լեյտենանտ Ավագ Նահապետյանը, ինքնաձիգը լիցքավորելուց հետո, պատահաբար սեղմել է ձգանը, որի հետևանքով արձակված գնդակը դիպել է գետնատնակում գտնվող Ա. Դալլաքյանի գլխին՝ անզգուշությամբ պատճառելով գլխի հրազենային գնդակային միջանցիկ վիրավորում՝ կյանքին վտանգ սպառնացող առողջության ծանր վնաս:
«Երբ գործը ուշադիր ենք նայում, լրիվ պարզ է դառնում, որ անզգուշություն չկա, անզգուշություն կարող է լինել զենքը մաքրելու կամ այլ գործողության ժամանակ, բայց երեխան եկել է գետնատնակ հանգստանալու, ու ինքը զինվորներից մեկից հատուկ զենք է վերցնում, մյուսից՝ փամփուշտակալ, ու սպայի կողմից էդպիսի կոպիտ սխա՞լ է լինում, ինքն է երեխեքին սովորեցնողը, այսպես ասած՝ կառավարողը, դասակի հրամանատարը: Այստեղ իր անգրագիտությունն է, չեմ կարող ասել՝ միտումնավո՞ր է եղել, թե՞ ոչ, որդիս ոչինչ չի հիշում»,- մանրամասնեց տիկինը:
Արմինե Ղազարյանի խոսքերով՝ դատական գործն անընդհատ ձգձգվում է, եղել են դեպքեր, երբ արդեն Արցախ է հասած եղել, զանգահարել են ասել, որ մեղադրյալը դիրքերում է, դատական նիստը չի կայանալու, հետաձգվում է: Տիկնոջ խոսքերով՝ բանակում պիտի լինեն պատրաստված գրագետ սպաներ, ովքեր պատճառ չեն դառնա մյուսների կյանքը վտանագելուն:
«Ասում են՝ մեղքը վերցրել է իր վրա, մեղմացնող է: Այսինքն՝ եթե մեղքը վերցրել է իր վրա, ուրեմն լավ է արել: Այսօր այնպիսի մարդիկ կան, որ անազատության մեջ են նույնիսկ զինվորին մի ապտակ հասցնելու համար: Ինչի է խրախուսվում է այս օրենքը: Դատարանում բերում են հրամանատարությունից այսպիսի սպային խրախուսող թղթեր, ես կաթվածահար էի լինում դատարանի դահլիճում: Իմ որդուն նման վիճակի հասցրած զինծառայողին խրախուսում են: Իսկ իմ որդուն հիմա էլ բարդ վիրահատություն է սպասվում, թղթերը արտասահման ենք ուղարկել, բարդ վիրահատություն է լինելու անոթների հետ կապված»,- շեշտեց տիկինը:
Նա հիշեցրեց, որ որդին ՌԴ-ից Հայաստան էր եկել հայրենիքի նկատմամբ իր պարտքը կատարելու համար, սակայն հաշմանդամություն է ձեռք բերել հայ սպայի մեղքով, հիմա էլ անընդհատ ցնցումների մեջ է ընկնում:
«Այնպես չէ, որ ես վրեժխնդիր եմ ուզում լինել, ուզում են՝ գնա այդ սպան, չգիտեմ՝ ինչ ճակատագրի արժանանա, պարզապես ուզում եմ արդարություն լինի: Որքանով է արդարացի, երբ որ մի ամբողջ ընտանիք Հայաստանում, կարելի է ասել՝ մուրացկանի կարգավիճակով, առանց տուն, առանց աշխատանք, մյուս երեխաներս ուսումի են, կիսված՝ կեսը ՌԴ-ում, կեսն այստեղ, իսկ ինքն էլ ոչինչ, թող գնա իր աշխատանքը շարունակի, կդաստիարակվի»,- նշեց նա:
Արմինե Ղազարյանի խոսքերով՝ եթե Հայաստանի դատական ատյաններում հնարավոր չլինի հասնել արդարության՝ դիմելու է ՄԻԵԴ:
Մանրամասները՝ տեսանյութում:
