Սեֆիլյանի և մյուսների գործով դատական նիստը անհասկանալի կերպով ընդմիջվեց, քանի որ անկառավարելի իրավիճակ էր դահլիճում: Նախ դատարանը հրապարակեց շտապօգնության բժշկի տեղեկանքը, թե ամբաստանյալ Ներսես Պողոսյանը ինքնուրույն քայլելով է ներկայացել բժշկին և հրաժարվել է բուժզննություն անցնելուց: Ներսես Պողոսյանը հայտարարեց, որ դա սուտ է, ինքը ինքնուրույն քայլելով չի ներկայացել: Ամաստանյալի շահերի պաշտպան Նինա Կարապետյանցը միջնորդեց հետաձգել դատական նիստը՝ իր պաշտպանյալի առողջական վիճակի պատճառով:
Նա ասաց, որ Ներսես Պողոսյանը 22 օր է՝ հացադուլի մեջ է և ի վիճակի չէ դատական նիստին ներկա գտնվելու: Դատարանը նշեց, որ քրեակատարողական հիմնարկից ամբաստանյալին բերել են, նշանակում է՝ նա ի վիճակի է դատին ներկա լինելու՝ ըստ ՔԿՀ բժշկի:
Փաստաբան Հայրապետյանը հայտարարեց, որ Ներսես Պողոսյանի նման վիճակով նիստը շարունակելը կնշանակի ներկա գտնվել նրա խոշտանգմանը. «Եթե Լևոն Հայրապետյանը օտար երկրում էր, հիմա մենք մեր երկրում ենք: Մենք չենք կարող մասնակցել նման թատերական ներկայացմանը»: Ժիրայր Սեֆիլյանը ոտքի կանգնեց և ասաց. «Չեմ կարող մասնակցել Ներսես Պողոսյանի խոշտանգմանը»: Ներսես Պողոսյանը դժվարությամբ ոտքի կանգնեց և հեռացավ դահլիճից:
Մի քանի րոպե հետո նախագահողը վերադարձավ դահլիճ և արձանագրեց, որ ամբաստանյալներ Սեֆիլյանը, Թոփչյանը, Գրիգորյանը և Կիրակոսյանը ոտքի չկանգնեցին: Նրանց նկատմնամբ դատարանը կիրառեց սանկցիա՝ նախազգուշացում: Ներսես Պողոսյանին թույլատրված է այս նիստին ոտքի չկանգնել: Նախագահողը հրապարակեց դատական կարգադրիչների պետի զեկուցագիրը, համաձայն որի քաղաքացի Ստելլա Աղաջանյանը դատարանի հասցեին անվայել արտահայտություններ է արել:Դտաարանը սանկցիա կիրառեց և Ստելլա Աղաջանյանին մինչև այս գործի քննության ավարտը հեռացրեց դատարանի դահլիճից: Դատարանը արձանագրեց նաև, որ առանց թույլտվության դատարանի դահլիճից հեռացել փաստաբաններ Նինա Կարապետյանցը, Արայիկ Պապիկյանը և Տիգրան Հայրապետյանը: Դատարանը հեռացավ խորհրդակցական սենյակ այս փաստաբանների նկատմամբ սանկցիա կիրառելու, որը կհրապարակվի ժամը 14.00-ին:
