Նախօրեին վարչապետ Կարեն Կարապետյանը այցելել էր Վանաձոր։ Մարզպետարանում տեղի ունեցած խորհրդակցության ընթացքում ներկայացվել է Վանաձորի ընդհանուր զարգացման հայեցակարգը, որը քաղաքի իշխանությունների հետ համագործակցությամբ մշակել են Պալերմոյում և Մոսկվայում գործունեություն ծավալող փորձառու մասնագետները:
Հայեցակարգի քննարկումից և հաստատումից հետո նախատեսվում է մշակել քաղաքի զարգացման «մաստեր պլանը», որով ընդգծվելու են նաև ներդրումների համար գրավչություն ներկայացնող վայրերը: Հայեցակարգի հեղինակները ներկայացրել են այն պոտենցիալ վայրերը, որոնք կարող են ապագայում դառնալ զվարճանքի կենտրոններ: Հայեցակարգով նախատեսվում է Վանաձորում ստեղծել ամառային և ձմեռային հանգստի գոտիներ, կառուցել հեծանվային ճանապարհ, սահուղիներ և այլն: «Անհրաժեշտ է այնպես անել, որպեսզի բիզնեսի համար ստեղծենք բարենպաստ պայմաններ, որ նա ցանկանա այստեղ գործել: Այսօր կան կոնկրետ ներդրողներ, ովքեր պատրաստ են Վանաձորում ներդրումներ իրականացնել, և մենք պետք է նրանց ուղղորդենք, ներկայացնենք հստակ ծրագրեր»,- հանդիպման ժամանակ ասել է Կարեն Կարապետյանը:
Վանաձորի ավագանու «Լուսավոր Հայաստան» խմբակցության ղեկավար Քրիստ Մարուքյանին վարչապետի այս հայտարարությունները, Պալերմոյի փորձը, առաջատար մասնագետներն ընդամենը ամպագոռգոռ հայտարարություններ են։ «Ես իրենց գործողություններում չեմ տեսնում որևէ բան, որով կարելի է զուգահեռ անցկացնել Պալերմոյի կամ Մոսկվայի հետ։ Շարունակելով վատ ավանդույթները, քաղաքի արտաքին տեսքն աղճատելով, հետո արդարանալով, թե դրանք վաղուց են այդպես եղել, վաղուց են սեփականաշնորհվել, հեռուն չենք գնա։ Պահի տակ հայտնվում են մարդիկ, ովքեր սկսում են շենքեր քանդել և պարզվում է, որ նրանք շատ վաղուց ունեն սեփականաշնորհման վկայական։ Հիմա եթե Պալերմոյից գան և փորձեն Վանաձորում եվրոպական չափանիշներով ինչ-որ բան կառուցել, ապա միանշանակ սեփականության և սեփականության վկայականի հետ կապված խնդիրներ են առաջանալու և պարզ չէ, թե ոնց են այդ խնդիրները լուծվելու։ Եվ հետո պարզ չէ, թե ինչպես են իրենք պատրաստվում Վանաձորում մեգապրոեկտներ իրականացնել, երբ անգամ մի հասարակ մայթի հարց չեն կարողանում լուծել։ Եվ հետո այդ մեգապրոեկտները հարվածելու են մի շարք անձանց շահերի»,- «Առաջին լրատվական»-ի հետ զրույցում ասաց Մարուքյանը։
Մեր զրուցակցի խոսքերով՝ հարց է նաև, թե այդ ռեսուրսը կա՞, թե՞ ոչ, որքանով են իրատեսական այդ պոտենցիալ ներդրողները։ «Մի տեսակ ամպագոռգոռ հայտարարություններ են այդ խոստումները։ Մենք էլի ենք ականատես եղել վարչապետների, ովքեր եկել են Վանաձոր, ներդրումների խոստումներ են տվել, խոստացել են ճոպանուղու տարածքը վերածել զբոսաշրջության կենտրոնի, ալպիական հովիտների հետ զուգահեռներ էին անցկացվում, բայց ինչպես ասում են՝ աչքը տեսածից է վախենում։ Դրա համար ոչ մի երաշխիք չկա, որ այս խոստումներն էլ կիրականանան»,- նշեց Մարուքյանը։
Ի դեպ, ուշագրավ է, որ և՛ մարզպետարանում կայացած խորհրդակցությանը, և՛ Վանաձորում իրականացված շրջայցին, Վանաձորի քաղաքապետ Մամիկոն Ասլանյանը չի մասնակցել։ Համենայնդեպս, կառավարության կայքում հրապարակված լուսանկարներում նա չկա։ Փոխարենը՝ բոլոր տեղերում վարչապետին ուղեկցում է Լոռու մարզպետ Արթուր Նալբանդյանը։ Ստացվում է, որ քաղաքի զարգացման ծրագրերին ավելի շատ մասնակցում է, ներգրավված է մարզպետը, քան քաղաքապետը։ Եվ հարց է առաջանում, որ եթե նրա հանդեպ վստահություն չկա, ապա ինչու էր ՀՀԿ-ն այդպես «դոշ տված» նրան պաշտպանում։
