Տարեսկզբին հիմնադրված Ռազմավարական նախաձեռնությունների կենտրոնը ներկայում աշխատում է 26 ծրագրի վրա: Այս մասին ինն ամիսների աշխատանքն ամփոփող ասուլիսի ժամանակ հայտարարեց ՌՆԿ գործադիր տնօրեն Ալեքսանդր Խաչատուրյանը` նշելով, որ այդ աշխատանքներն իրականացնում են 22 հոգանոց թիմով: «Դրանք մեծությամբ, լայնությամբ, խորությամբ տարբեր ծրագրեր են, ժամկետայնությամբ էլ են տարբեր: Երբ մենք ասում ենք ծրագրեր ենք իրականացնում, հիմնականում դա չի նշանակում, որ մենք ենք հիմնական ծրագիր տանողը, մենք աջակցող ենք, բայց ակտիվ աջակցող ենք: Փորձում ենք կազմակերպել, միջնորդել, փորձագետներ ներգրավել»,-ասաց Ալեքսանդր Խաչատուրյանը:
Աշխատանքներն իրականացնում են թիրախային ու գերակա համարված պետական կառավարման, դատական համակարգերի, տեղեկատվության և բարձր տեխնոլոգիաների, պետական-մասնավոր գործընկերության, հարկային և մաքսային վարչարարության, կրթության, զբոսաշրջության, գյուղատնտեսության ուղղություններով:
Խաչատուրյանի խոսքով` ակտիվորեն աշխատում են դոնոր կազմակերպությունների հետ տեխնիկական աջակցություն ստանալու նպատակով: Ի դեպ, այստեղ խոսքը ոչ թե կենտրոնին դրամական աջակցություն ցուցաբերելու մասին է, այլ կոնկրետ ծրագրերով փորձագետների ներգրավման: Այսպիսով` կենտրոնը 3.1 միլիոն դոլարի տեխնիկական աջակցություն է ստացել դոնոր կազմակերպություններից, 500 հազար դոլար էլ տրամադրվել է ՌՆԿ ընթացիկ գործունեության համար: Բանակցություններ են վարվում ևս 3.5 միլիոն դոլար աջակցություն ստանալու համար:
«2017 թվականի ինն ամիսներին հիմնադրամն ունեցել է 133.7 դրամի ֆինանսական մուտքեր, որից 100 միլիոն դրամը պետական բյուջեից, 33.7 միլիոն դրամը մասնավոր նվիրատվություններն են»,-նշեց ՌՆԿ տնօրենը:
2017 թվականի ինն ամիսներին կենտրոնի կողմից ծախսվել է 133.4 միլիոն դրամ, որից 71.7 դրամը բաժին է հասել աշխատավարձերին: Ընդ որում` 22 աշխատակիցներից 6-ը վարձատրվում են դոնոր կազմակերպություններից կողմից: Գործուղումների վրա ծախսվել է 15.2 միլիոն, խորհրդատվական ծառայությունների համար` 9.7 միլիոն դրամ:
