Գիտության պետական կոմիտեն ու Հայ Առաքելական եկեղեցին համագործակցել են Ռուսաստանի Ուղղափառ Սուրբ եկեղեցու և Նոր Նախիջևանի Թեմի հետ։
ՀՀ ԿԳՆ գիտության պետական կոմիտեի նախագահ Սամվել Հարությունյանը ներկայացրեց իրենց կատարած աշխատանքները 2016 թվականի սեպտեմբերից մինչև 2017 թվականի սեպտեմբերն ընկած ժամանակահատվածում։
Կոմիտեի նախագահի խոսքով՝ իրենց կառույցը մեկ տարվա ընթացքում անցկացրել է մրցույթներ, որոնցից մեկը՝ Հայ Առաքելական եկեղեցու հետ համատեղ։
«Ռուսաստանի և Նոր Նախիջևանի հայկական թեմի հետ համագործակցության շրջանակում հայտարարված մրցույթին ներկայացվել են 12 հայտ, որոնցից ֆինանսավորվել է 6-ը։ Մրցույթի թեմաները կապ չունեն եկեղեցու հետ, այլ հայ ժողովրդի ունեցած ներդրմանը Ռուսաստանի մշակույթի, գիտության և արվեստի ոլորտներում։ Յուրաքանչյուր կողմից այս ծրագրերի իրականացման համար հատկացվել է 150-հազարական ԱՄՆ դոլար»,- նշեց Սամվել Հարությունյանը։
Մեկ տարվա ընթացքում ՀՀ ԿԳՆ գիտության պետական կոմիտեն տարբեր աշխատանքներ է իրականացրել։
«Իրականացրած կարևորներ աշխատանքներից մեկն այն է, որ շուտով կներկայացվի գիտության մասին օրենքը, որի շուրջ վերջին 3-4 տարին քննարկումներ են եղել։ Այս օրենքի շուրջ եղել են բազմաթիվ դիտողություններ և առաջարկություններ, որոնք հաշվի առնելով կազմել ենք ՀՀ գիտության և գիտատեխնիկական գործունեության մասին նոր օրենքը։ Այն շուտով կներկայացնենք Կառավարություն։ Անցյալ տարի «ՀՀ գիտության ոլորտի զարգացման 2017-2020 թվականների ռազմավարական ծրագիրն է ներկայացվել Կառավարություն, որն օգոստոսի 17-ին հավանության է արժանացել։ Ռազմավարական ծրագիրն իր մեջ ներառում է բազմաթիվ խնդիրներ, որոնք վերաբերում են գիտության ոլորտում կատարվող աշխատանքներին։ Դրանցից են՝ գիտության և տեխնոլոգիաների ոլորտի կառավարման համակարգի կատարելագործումը, գիտական կադրերի վերարտադրության արդյունավետ համակարգի ներդրումներն ու գիտության ենթակառուցվածքների արդիականացումը և այլն»,- նշեց Հարությունյանը։
Նա շեշտեց, որ 2016 թվականին ստեղծվել է «Գիտական ծրագրերի ինտեգրմանն աջակցության կենտրոն, որին իրենք շատ մեծ կարևորություն են տալիս։
«Կենտրոնը պետք է զբաղվի եվրոպական և միջազգային ծրագրերի և գիտական աջակցության խնդիրներով, օգնի, որպեսզի մեր գիտնականները կարողանան հստակ ձևակերպել իրենց ծրագրերն ու ներկայացնել տարբեր մրցույթների»,- ասաց կոմիտեի նախագահը։
Մրցույթներից նա առանձնացրեց նաև հիմնարար հետազոտությունների բելառուսական հիմնադրամի հետ համատեղ մրցույթը, որտեղ եղել են 57 հայտ, որոնցից ֆինանսավորվել են 19-ը։
