«Որևէ մեկի հետ համագործակցել-չհամագործակցելու խնդիր, անձամբ ես, չունեմ։ Հայաստանն այն վիճակում չէ, որ սկսենք մարդկանց ջոկջկել ըստ տեսակների, մտածողության։ Բոլորի համար է ակնհայտ, որ այս ընթացքը տանում է տնտեսական, էկոլոգիական, ժողովրդագրական կոլափսի՝ պատերազմի դաշտում որոշել, թե ում հետ գնալ՝ երկրորդական հարց եմ համարում»,- «Առաջին լրատվական»-ի հետ զրույցում անդրադառնալով օրերս Սեֆիլյանի հրապարակած ցուցակի գործիչների հանդիպմանը, ասաց Գերագույն խորհրդի պատգամավոր Ալբերտ Բաղդասարյանը։
Բաղդասարյանը հավելում է. «Կգանք ընդհանուր հայտարարի՝ շատ լավ, ոչ՝ կյանքը դրանով չի դադարում։ Բայց ես կուզեի, որ անպայման ընդհանուր հայտարարի գայինք»։
Ազատազրկված Սեֆիլյանը, Եղնուկյանը և Ավետիսյանը հերթական միասնական նամակն են հրապարակել՝ այս անգամ առաջարկելով զարգացնել հայ-իրանական հարաբերությունները։ Ոչ վաղ անցյալում նույն գործիչներն առաջարկում էին հայ-ամերիկյան հարաբերությունները խորացնել։ Բաղդասարյանից հետաքրքրվեցինք՝ արդյո՞ք ԱՄՆ-Իրան հարաբերությունների ֆոնին սա խնդրահարույց չի դառնա մեզ համար. «Ցանկացած քաղաքական քայլ անելուց առաջ դու պետք է ունենաս ինքնիշխան պետություն, որն այսօր չունենք։ Մենք չունենք ինքնիշխան որոշումներ ընդունող, ժողովրդի առաջ պատասխանատու իշխանություն։ Եթե մենք չենք ստեղծել այդ համակարգը, եթե պետական կառավարման համակարգը մեկ մարդունն է ու այսօր էլ քննարկվում է՝ Սերժ Սարգսյանը գենսե՞կ կլինի՝ Բաղրամյան 26-ից կղեկավարի՞, թե՞ կառավարության գլխից, ինձ համար կարևոր չէ։ Սեֆիլյանենց մտորումներն ինձ համար սովորական մտորումներ են, որոնք տարբեր տեղեր տարբեր մարդիկ շատ են անում, դա չի կարող ուղեցույց լինել որևէ մեկի համար, եթե այդ քաղաքականությունը վարող սուբյեկտ չկա։ Ափսոս, որ բանտից է, առաջներում պապլավոկներից էին այդ խոսակցությունները։ Ողջունում եմ, որ Սեֆիլյանենք ձեռքը պուլսի վրա են պահում՝ գտնվելով բանտում, կուզեի, որ նրանք ազատ արձակվեին, նստեինք ու բանավեճ անեինք»։
Հարցազրույցն ամբողջությամբ՝ տեսանյութում:
