Ամերիկյան զինվորականները ձեբակալել են Պակիստանի թալիբների առաջնորդ Խակիմուլա Մեխսուդի «աջ ձեռք» Լատիֆուլա Մեխսուդին: Այս մասին ճեպազրույցում տեղեկացրել է ԱՄՆ-ի Պետդեպարտամենտի ներկայացուցիչ Մարի Հարֆը:
«Ես կարող եմ հաստատել, որ ռազմական գործողություն իրականացնելու ժամանակ ամերիկացի զինվորականները ձերբակալել են Լատիֆ Մեխսուդին»,- ասել է Հարֆը:
Սակայն Աֆղանստանի կառավարությունը դեպքն այլ կերպ է նկարագրել: Քաբուլի պաշտոնական անձանց վկայությամբ՝ ԱՄՆ-ի զինծառայողները փաստացի աֆղանական հետախուզության ձեռքից խլել են Մեխսուդին, ովքեր նրա հետ պայմանավորվել էին հանդիպման մասին՝ մի քանի ամիս համոզելով նրան միջազգային խաղաղություն հաստատելու շուրջ բանակցություններում որպես միջնորդ հանդես գալ:
Քաբուլի տեղեկությունների համաձայն՝ ամերիկյան զինծառայողները կանգնեցրել են Մեխսուդին տեղափոխող ավտոշարասյունը, ձերբակալել են նրան, այնուհետև տեղափոխել Բահրամում գտնվող իրենց բազան: Թե երբ է դա տեղի ունեցել, չի նշվում:
Ամերիկյան կողմի գործողություններն էլ ավելի են բարդացրել Վաշինգտոնի և Քաբուլի բանակցությունները, որոնք ուղղված են անվտանգության ոլորտում համագործակցելուն:
Չհայտարարված այցով Քաբուլում գտնվող ԱՄՆ պետքարտուղար Ջոն Քերիին ուղեկցող պաշտանատար անձն ընդգծել է, որ ԱՄՆ-ը նախկինի պես ցանկանում է այդ համաձայնագիրը կնքել մինչև ամսվա վերջը:
Ամերիկյան կողմի տվյալներով՝ պակիստանյան թալիբները համագործակցում են աֆղանականների հետ՝ Աֆղանստանում գտնվող կոալիցիոն ուժերի դեմ պայքարելու գործընթացում:
