Ամերիկյան Ford Motor Company ավտոարտադրող ընկերությունը փորձարկում է անվտանգության նոր համակարգ: Ընկերությունում պնդում են, որ այժմ մեքենաներն ի վիճակի կլինեն ինքնուրույն խուսափել վտանգներից:
Այս համակարգի էությունն այն է, որ այն իր վրա է վերցնում մեքենայի ղեկային անիվների վերահսկողությունը, երբ ներդրված ցուցիչները ճանապարհին վտանգավոր պահ են արձանագրում, օրինակ՝ երբ երթևեկելի մաս մարդ է վազում:
Obstacle Avoidance-ը սկզբում վարորդին զգուշացնում է վտանգի մասին, իսկ եթե նա չի հասցնում ժամանակին արձագանքել, ապա իր վրա է վերցնում մեքենայի կառավարումը: Տեղեկացվում է, որ համակարգի փորձարկվող տարբերակն արդեն տեղադրված է Ford Focus-ի վրա, և ընկերության ինժեներները ներկա պահին Գերմանիայում հատուկ փորձահրապարակներում տարբեր թեստեր են անցկացնում:
Համակարգը 200 մետրի վրա կարողանում է սքանավորել տարածությունը՝ օգտագործելով երեք ռադարներ, ուլտրաձայնային սենսորներ և օպտիկական տեսախցիկներ:
Ընկերությունում ասում են, որ կեսօրին, լավ եղանակային պայմաններում և լավ տեսանելիության ժամանակ միգուցե այս համակարգն այնքան էլ օգտակար չլինի, սակայն գիշերը, խիտ մառախուղի ժամանակ այն իրականում կարող է օգնել: Ընդ որում, Ford-ն առայժմ չի տեղեկացնում, թե երբ կավարտվի փորձարկումը:
Հարկ է նշել, որ այս համակարգն իր թերություններն ունի: Հիմնականում դրանք վերաբերում են դրա աշխատանքի դանդաղկոտությանը: Լավ արդյունքների առայժմ հնարավոր է հասնել միայն 60 կմ/ժ արագության դեպքում: Սակայն ընկերությունում պնդում են, որ կշարունակեն զարգացնել համակարգը:
