Քաղաքապետ Տարոն Մարգարյանը Երևանի օրվա տոնակատարություններին մասնակցելու նպատակով մայրաքաղաք այցելած քույր և գործընկեր քաղաքների պաշտոնական պատվիրակությունների և Երևանի ավագանու անդամների հետ այցելել է «Էրեբունի» պատմահնագիտական արգելոց-թանգարանի հարակից տարածք, որտեղից դեռ առավոտից տրվել էր «Էրեբունի-Երևան 2795» տոնական միջոցառումների մեկնարկը:
Երևանի քաղաքապետարանի տեղեկատվության և հասարակայնության հետ կապերի վարչությունից «Առաջին լրատվական»-ին հայտնում են, որ քաղաքապետը հյուրերի հետ միասին նախ շրջել է Էրեբունի փողոցի գրեթե ողջ երկայնքով, ծանոթացել ներկայացված ժողովրդական արվեստի գործերին, ազգային խաղերի, տարազի ու խոհանոցի ցուցադրություններին:
Տոնախմբության մասնակիցները Երևանի քաղաքապետին և նրան ուղեկցող մայրաքաղաքի հյուրերին սիրով առաջարկել են օգտվել տոնական հյուրասիրությունից, ինչից վերջիններս չեն հրաժարվել:
Քաղաքապետ Տարոն Մարգարյանը զրուցել է տոնակատարության մասնակիցների հետ, ովքեր, օգտվելով առիթից, գոհունակությամբ իրենց շնորհակալությունն են հայտնել տոնը հրաշալի կազմակերպելու և այն հիրավի համաժողովրդական տոնախմբության վերածելու համար:
Մայրաքաղաքի հյուրերն այնուհետ քաղաքապետ Տարոն Մարգարյանի ուղեկցությամբ ներկա են գտնվել նաև «Էրեբունի» պատմահնագիտական արգելոց-թանգարանի հարակից տարածքում կազմակերպված «Երևանում տոն է» խորագիրը կրող համերգին:
Ի դեպ, քաղաքապետի հրապարակ այցելության պահին բուլղարացիների դարպասը խփած գոլով մայրաքաղաքի տոնը յուրովի շնորհավորեցին նաև Հայաստանի ազգային հավաքականի ֆուտբոլիստները:
