Վերաքննիչ քրեական դատարանում այսօր ավարտվեց Գագիկ Գեղամյանի գործով բերված վերաքննիչ բողոքի քննությունը:
Գործը քննվել է Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում:
Ըստ դատական ակտի՝ Գագիկ Գեղամյանը, չունենալով «D» կարգի տրանսպորտային միջոց վարելու իրավունքի վկայական, վարել է «ԻՍԱՎ» ՍՊԸ-ին պատկանող, իրեն չամրակցված, բայց վստահված «ԳԱԶ-32213» մակնիշի ավտոմեքենան՝ որպես թիվ 22 երթուղային տաքսի:
2012 թվականի հունվարի 27-ին, ժամը 12-ն անց 30 րոպեին Գեղամյանը Նորքի 13-րդ և 15-րդ փողոցների խաչմերուկում ուղևորներ իջեցնելու նպատակով կանգնեցրել է մեքենան:
Իջել է խուլուհամր Տաթևիկ Հ.-ն՝ երկու երեխաների հետ, ավագ երեխան 4-ամյա Մարկոսն էր:
Երկու երեխաների հետ լինելով՝ Տաթևիկը վճարել է միայն 100 դրամ, ինչով, ըստ դատական ակտի, հարուցել է երթուղայինի վարորդի զայրույթը:
Տաթևիկն իջել է՝ ձախ ձեռքով գրկելով կրտսեր երեխային, աջ ձեռքով բռնելով ավագի՝ Մարկոսի ձեռքը: Այնուհետև նա բաց է թողել Մարկոսի ձեռքը, որ կարողանա փակել երթուղայինի դուռը:
Չորսամյա Մարկոսը երթուղայինի առջևի աջ անկյունային մասից քայլելով՝ ցանկացել է հատել փողոցը:
Ըստ դատական ակտի՝ «ամբաստանյալը, չսպասելով, որ ուղևորը փակի մեքենայի դուռը, չհամոզվելով մանևրի անվտանգության մեջ, վերսկսել է երթևեկությունը և, հնարավորություն ունենալով հայտնաբերել իր վարած մեքենայից իջած ու դրա առջևում հայտնված անչափահաս հետիոտն Մարկոսին, մանևրել է դեպի առաջ ու ձախ, որի արդյունքում ավտոմեքենայի առջևի կենտրոնական մասով վրաերթի է ենթարկել երեխային: Ամբաստանյալը, զգալով ավտոմեքենայի ոչ սովորական տատանում, սակայն չմտածելով, որ մեքենան անցել է երեխայի վրայով, արգելակել է, դուրս գալով ու տեսնելով ավտոմեքենայի հետևի մասում՝ գետնին ընկած երեխային, գրկել է նրան ու նրա մոր հետ նույն մեքենայով գնացել հիվանդանոց, սակայն ստացած մարմնական վնասվածքներից երեխան ճանապարհին մահացել է»:
Գագիկ Գեղամյանն իրեն մեղավոր չի ճանաչել առաջադրված մեղադրանքում՝ ՀՀ քրեական օրենսգրքի 242 հոդվածի 2-րդ մասով: Նա պատճառաբանել է, որ հանցագործություն չի կատարել՝ երեխային տեսնելու տեխնիկական հնարավորություն չունենալով:
Ամբաստանյալի կարծիքով՝ «նկատի ունենալով, որ երեխան մահացել է իր վարած մեքենայի տակ ընկնելու հետևանքով, միակ տարբերակն այն է, որ նա պպզած լինի մեքենայի առջևի մասում, այդ դեպքում ինքը նրան չէր նկատի»:
Դատարանը հաստատված է գնահատել նախաքննական մարմնի կողմից Գագիկ Գեղամյանին առաջադրված մեղադրանքը և նրան դատապարտել է 4 տարի ազատազրկման:
Գեղամյանը 3 տարով զրկվել է տրանսպորտային միջոցներ վարելու իրավունքից:
Այս դատավճռի դեմ վերաքննիչ բողոք էր բերել պաշտպանական կողմը՝ պնդելով, որ Գեղամյանը պետք է արդարացվի ու անմեղ հռչակվի:
Այսօր վերաքննիչ քրեական դատարանը ամբաստանյալ Գեղամյանին հարցրեց՝ համաձա՞յն է, արդյոք, որ իր նկատմամբ համաներում կիրառելով՝ քրեական գործի վարույթը կարճվի: Այդ դեպքում մարդը դատվածություն չէր ունենում, բայց նա այլևս չէր կարող արդարացման առումով բողոք ներկայացնել:
Ամբաստանյալը խորհրդակցեց իր շահերի պաշտպան Նիկոլայ Բաղդասարյանի հետ:
Պաշտպանական կողմը հրաժարվեց համաներման ա՛յս ձևով կիրառումից՝ նպատակ ունենալով արդարացման հասնել եթե ոչ՝ վերաքննիչ, ապա հաջորդ դատական ատյանում:
Ստեղծված իրավիճակում համաներման կիրառման երկրորդ տարբերակն էլ կար տվյալ հոդվածով դատապարտված ամբաստանյալի համար, ինչը և արվեց վերաքննիչ դատարանի կողմից:
Վերաքննիչ քրեական դատարանը պաշտպանական կողմի վերաքննիչ բողոքը մերժեց՝ ուժի մեջ թողնելով ընդհանուր իրավասության դատարանի դատավճիռը: Ապա համաներման կիրառմամբ Գագիկ Գեղամյանին ազատեց դատավճռով սահմանված հիմնական պատժի կրումից՝ 4 տարի ազատազրկումից: Բայց Գեղամյանը կհամարվի դատվածություն ունեցող, եթե կայացված դատական ակտերը օրինական ուժի մեջ մտնեն:
Դատավճռով Գեղամյանի նկատմամբ նշանակված լրացուցիչ պատիժը՝ 3 տարով տրանսպորտային միջոցներ վարելու իրավունքից զրկումը, մնաց անփոփոխ և ուժի մեջ:
Ամբաստանյալ Գագիկ Գեղամյանն անհապաղ ազատ արձակվեց կալանքից դատարանի դահլիճում:
