ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա) և Էնդրյու Շաֆերը (ԱՄՆ) ՄԱԿ-ի Գլխավոր ասամբլեայի շրջանակում սեպտեմբերի 22-23-ը առանձին, այնուհետ համատեղ հանդիպումներ են անցկացրել Հայաստանի և Ադրբեջանի արտգործնախարարներ Էդվարդ Նալբանդյանի և Էլմար Մամեդյարովի հետ: Հանդիպմանը մասնակցել է նաև ԵԱՀԿ գործող նախագահի անձնական ներկայացուցիչ Անջեյ Կասպրշիկը։
Հայաստանի և Ադրբեջանի արտգործնախարարների բանակցությունների գլխավոր նպատակն էր ԼՂ հակամարտության գոտում ընթացիկ իրավիճակի քննարկումը, բանակցային գործընթացի ակտիվացման ուղիների ուսումնասիրումը և Հայաստանի ու Ադրբեջանի նախագահների առաջիկա գագաթնաժողովի նախապատրաստումը։ Այս մասին ասվում է ԵԱՀԿ Մինսկի խմբի հայտարարության մեջ:
Համանախագահներն ակնկալում են, որ գագաթնաժողովը կնպաստի կողմերի միջև վստահության և քաղաքական կամքի խորացմանը՝ գտնելու հակամարտության կարգավորման հիմնական հարցերով փոխզիջումային լուծումներ։ Նախարարները հանձնառություն են արտահայտել աշխատելու համանախագահների հետ՝ մոտ ապագայում նախապատրաստելու հաջող գագաթնաժողով։
Համանախագահները հանդիպել են նաև ԵԱՀԿ գլխավոր քարտուղար Թոմաս Գրեմինգերի և ՄԱԿ-ի գլխավոր քարտուղարի քաղաքական հարցերով տեղակալ Ջեֆրի Ֆելթմանի հետ՝ տեղում իրավիճակի ու խաղաղ կարգավորման գործընթացում վերջին իրադարձությունները քննարկելու և բարձր մակարդակով հաջորդ հանդիպման նախապատրաստման մասին իրազեկելու համար:
Համանախագահները մտադիր են հոկտեմբերի սկզբին տարածաշրջանային այց կատարել:
