Այսօր Sharm Pictures-ը հանդիսատեսին հանձնեց «Քայլ ձիով» նոր հայ-ղազախական համատեղ կինոկատակերգությունը: Ֆիլմի նկարահանումներն ընթացել են Հայաստանում, Ղարաբաղում և Ղազախստանում: Ֆիլմի նկարահանման համար հրավիրվել են միջազգային փորձ ունեցող մասնագետներ:
Գլխավոր դերերում հանդես են գալիս Հովհաննես Ազոյանը, Մկրտիչ Արզումանյանը, Ասել Սագատովան, Թամարա Պետրոսյանը: Ռեժիսորը Գոռ Կիրակոսյանն է (ԱՄՆ), երկրորդ ռեժիսորը` Իլյա Ֆարֆելը, բեմադրող օպերատորը` Ֆիլիպ Վանդևալը (Բելգիա), սցենարի հեղինակները` Նարեկ Մարգարյանը, Սերգեյ Սարգսյանը, կոմպոզիտորը` Նարեկ Հովսեփյանը (A.Chilla): Սաունդթրեքի հեղինակը և կատարողը Թաթա Սիմոնյանն է, շախմատային հարցերով ֆիլմի խորհրդատուն` Տիգրան Պետրոսյանը, պրոդյուսերը` Արմեն Համբարձումյանը, գլխավոր պրոդյուսերը` Կարեն Ղազարյանը:
Ֆիլմը նվիրվել է Մարկ Սաղաթելյանի լուսավոր հիշատակին:
Խոսելով այն մասին, թե ինչու են հայ-ղազախական համատեղ ֆիլմ նկարահանել, Կարեն Ղազարյանն ասաց, որ «Շարմ» ընկերությունն անցյալ տարի երրորդ կատակերգությունը թողարկեց՝ Հովհաննես Ազոյանի մասնակցությամբ, և դրանից հետո որոշեցին շարունակել, բայց այս անգամ արդեն գլխավոր դերում, Հովհաննես Ազոյանից բացի, հանդես եկավ նաև Մկրտիչ Արզումանյանը:
Երբ մտադրություն են ունեցել նկարել ֆիլմ հայտնի դերասանների մասնակցությամբ, հարց է ծագել՝ ինչի մասին լինի ֆիլմը և ում հետ պետք է այն նկարահանեն, քանի որ, Կարեն Ղազարյանի խոսքերով, Հայաստանի շուկան այդքան մեծ չէ բազմաթիվ ֆիլմեր նկարելու համար:
«Գործի բերումով հաճախ Ղազախստան էինք մեկնում: Այնտեղ շփվելով ղազախների հետ՝ հասկացանք, որ երկար տարիներ հայերը և ղազախները շատ մտերիմ բարեկամներ են եղել, ու որոշեցինք համատեղ ծրագիր իրականացնել»,- ասաց Կարեն Ղազարյանը:
Ֆիլմի ռեժիսորը մեր հայրենկից, Միացյալ Նահանգների քաղաքացի Գոռ Կիրակոսյանն է:
Հովհաննես Ազոյանն էլ նշեց, որ իրեն իր դերը դուր է եկել. «Կարծում եմ՝ քանի որ ինքս շախմատ խաղալ գիտեմ և շատ լավ եմ խաղում, իմանալով շախմատիստի հոգեբանությունը, կարծում եմ՝ շատ լավ եմ կերտել այդ կերպարը»:
Քանի որ ֆիլմը Մարկ Սաղաթելյանի հիշատակին է նվիրված, հարց հնչեց՝ արդյոք սցենարում փոփոխություն եղե՞լ է: Կարեն Ղազարյանը նշեց, որ ֆիլմում փոփոխություններ չեն եղել, որովհետև Մարկն իր դերը ֆիլմում արդեն խաղացել էր, և Մարկի մասնակցությամբ նկարանահումներն արդեն տեղի էին ունեցել դժբախտ դեպքից առաջ. «Քանի որ այս ֆիլմը վերջին ֆիլմն է, որտեղ նկարահանվել է Մարկ Սաղաթելյանը, մենք գտանք ճիշտ, որ նվիրենք նրա հիշատակին»:
Հարցին, թե ինչու «Շարմը» պատմական ֆիլմեր չի նկարահանում, նա պատասխանեց, որ շատ մեծ ցանկություն կա այդպիսի ֆիլմեր նկարելու, և հիմա հրաշալի սցենար է պատրաստ Չարենցի կյանքի մասին, իսկ նման թեմաները պարտադրում են շատ ավելի լուրջ վերաբերվել այդ ֆիլմերի արտադրությանը:
