Forbes ամսագիրը կազմել է Նոբելյան մրցանակակիրների ցուցակը, ովքեր մրցանակի իրենց գումարը ծախսել են առավելագույնս արտասովոր կերպով: Դրանցից են Kawasaki մոտոցիկլետի թարմացումն ու կրիկետի հրապարակի կառուցումը: Վերջինի հեղինակը բրիտանացի կենսաքիմիկոս Ռիչարդ Ռոբերթսն է, ով 1993-ին մրցանակի էր արժանացել ֆիզիոլոգիայի և բժշկության ոլորտում:
Նոբելյան մրցանակակիրները ստանում են 1.2 մլն դոլար:
Չնայած Նոբելյան մրցանակակիրների մեծ մասը ստացված գումարը ներդնում են գիտության և բարեգործության մեջ, այնուամենայնիվ՝ ոմանք այն ծախսում են իրենց կարիքների համար: Մոտոցիկլետի թարմացման հեղինակը 2001-ին բժշկության և ֆիզիոլոգիայի ոլորտում մրցանակի արժանացած բրիտանացի կենսաքիմիկոս, Ռոքֆելլերի համալսարանի նախագահ Փոլ Ներսն է:
Ռուս գրող Իվան Բունինը, ով գրականության ոլորտում 1933-ին արժանացել էր Նոբելյան մրցանակի, գումարի մեծ մասը ծախսել է երեկույթների, ինչպես նաև ռուս էմիգրանտների նպաստների վրա:
Իսկ ահա գրականության ոլորտում առաջին Նոբելյան մրցանակակիր (1901), ֆրանսիացի պոետ Ռենե Ֆրանսուա Արման Սյուլի-Պրյուդոմը հավերժացրել էր իրեն՝ հիմնադրելով սեփական պոետիկ մրցանակ: Այն գոյություն է ունեցել մինչ պոետի մահը՝ 6 տարի:
Նրա օրինակին է հետևել ամերիկացի նյարդակենսաբան Փոլ Գրինգարդը (պարգևատրվել է 2000 թվականին, ֆիզիոլոգիայի և բժշկության ոլորտում)՝ ստեղծելով Pearl Meister Greengard մրցանակը՝ նվիրված իր մայրիկին, ով մահացել էր ծննդաբերության ժամանակ: Նա ամեն տարի 100 հազար դոլարի մրցանակ է շնորհում բժշկության ոլորտում կին հետազոտողներին: Մրցանակը շնորհվում է 2004 թվականից:
Իսկ ահա 2002-ին գրականության ոլորտում Նոբելյան մրցանակի արժանացած հունգարացի գրող Իրմե Կերտեշը ողջ մրցանակը նվիրել էր կնոջը՝ տասնամյակների ընթացքում աղքատությանը դիմանալու համար:
