Ժողովրդական ապրանքանիշ N 1 մրցանակաբաշխության առաքելությունը ներքին շուկայում հայրենական արտադրության ապրանքների առաջմղումն է: Այսօր տեղի ունեցած մամուլի ասուլիսի ժամանակ ասաց Սպառողների աջակցման կենտրոնի տնօրեն Աշոտ Միրզոյանը:
Նրա խոսքով՝ սննդամթերքի ոլորտում ամենակարևորը դրա անվտանգության խնդիրներն են: «Մենք ուզում ենք հստակեցնել մարդկանց պատկերացումները` ապրանք գնելու պահին կողմնորոշվել որոշակի չափորոշիչներով: Մրցանակաբաշխության մեկնարկն արդեն իսկ տրված է, վաղվանից մինչև հոկտեմբերի 31-ը «Արմպրոդուկտ» կայքում կսկսվի քվեարկությունը: Մարդկանց կտրվի միայն մեկ հարց` ներկայացված տասը ապրանքանիշներից որն են համարում ամենալավը: Առաջատար, ամենաշատ քվեներ ստացած մի քանի ապրանքատեսակներ կուղարկենք լաբորատորիաներ` անկախ փորձաքննության: Նույնիսկ լաբորատորիայի աշխատակիցներին չենք ասի` որ ֆիրմայի հյութն ենք հանձնել փորձաքննության»,- ասաց նա:
Ասուլիսի մյուս բանախոս, «Արմպրոդուկտ» կայքի կոմերցիոն հարցերով տնօերն Ռուզաննա Հունանյանն իր հերթին տեղեկացրեց, որ կայքում ներկայացված տասը կատեգորիաները ներառելու են հետևյալ սննդատեսակները` հյութ, մսամթերք, գինի, պանիր, հանքային ջուր, թթվասեր, կոնյակ, պահածոյացված մթերք, զովացուցիչ ըմպելիք, չրեղեն:
