Հայաստանում երեք գործընթաց կա, որոնք ներքին կյանքի հիմնական բովանդակությունն են կազմում: Հոկտեմբերի 9-ին լրագրողների հետ հանդիպմանը «Ղարաբաղ» կոմիտեի անդամ Աշոտ Մանուչարյանը նշեց, որ, ցավալիորեն, Հայաստանի ներքին կյանքը շատ բանով ձևավորվում է արտաքին ազդակների տակ: «Ես «ցավալիորեն» չէի ասի, եթե այդ ազդակները լինեին առողջ: Ունիվերսալ մարդու ստեղծման գործընթաց է կատարվում: Ուժեղ կամային, էներգետիկ վիճակներ մարդը չպետք է ունենա, քանի որ այդպես հեշտ է կառավարվում»,- ասաց նա՝ նշելով, որ փորձում են Հայաստանը ևս դարձնել տարածք, որում ունիվերսալ մարդիկ են, հեշտ կառավարվող:
Մանուչարյանի խոսքով՝ մենք ականատես էինք եվրոպական և ռուսական ներկայացող ուժերի միջև բախումների, քաղաքական ուժերը, լրատվամիջոցները, անալիտիկ կենտրոնները խոսում են այդ՝ պայմանական եվրոպական և ռուսական ներկայացող դիրքերից: «Ղարաբաղ» կոմիտեի անդամի կարծիքով՝ աշխարհի տարբեր կետերում կազմակերպվում է բախում պայմանական Ռուսաստանի և պայմանական Եվրոպայի միջև՝ հնարավոր դաշինքից խուսափելու համար: «Հայաստանը ցավալիորեն դարձել է այն տարածքներից մեկը, որտեղ այդ բախումը տեղի է ունենում: Մենք մասնակցում ենք այդ պայքարին՝ նպաստելով Ռուսաստանն ու Եվրոպան ոչնչացնել փորձող աշխարհակալ ուժերի նպատակների իրագործմանը»,- ասաց նա:
Ըստ Մանուչարյանի՝ ներկայումս կան ուժեր, որոնք կոչված են կյանքի բերել Հայաստանը, ազատամարտիկները սկսեցին մի բանից, հետո սրընթաց սկսեցին խորանալ և կյանքի ողջ խորությունը կարծես թե փորձում են ամփոփել: Վերջիններս, Մանուչարյանի կարծիքով, «ինչ-որ բան այնպես չէ Դանիոց արքայությունում» տրամաբանությամբ սկսեցին ելույթները, հետո խորացան՝ հրավիրելով երիտասարդությանը, մտավորականությանը: «Ինչքան էլ գրագետ չլինի ազատամարտիկը, նա տեսել է կյանքի և մահու սահմանը, մարդիկ է կորցրել, ինքն է անցել դրա միջով, դրա համար նրա մեջ անկոտրում մի բան կա: Ես պատրաստակամություն եմ հայտնել նրանց հետ ամենախոր համագործակցության, քանի որ դա հանուն Հայաստանի է, «Ավե Մարիայի» կատարումը՝ հայկական տարբերակով»,- ասաց նա:
Բանախոսը տեղեկացրեց, որ ազատամարտիկները Թարգմանչաց տոնին նվիրված հավաք են անցկացնելու մտավորականների հետ. նրանք զգում են, որ պատերազմի նման մի բան է տեղի ունենում Հայաստանում, բայց այդտեղ գեներալներն իրենք չեն, այլ մտավորականներն ու կրոնավորները: Մանուչարյանի համոզմամբ՝ անգամ այն մտավորականությունը, որ շեղված է, խեղված ինչ-որ իմաստով, լսելով այդ կանչը, կոչը, զորակոչը՝ սկսում է ենթարկվել դրան:
Չի կարելի ասել, որ իշխանության կողմից ազատամարտիկների քայլերին ընդհանրապես արձագանք չկա, իշխանությունը, ըստ բանախոսի, շատ ուշադիր հետևում է: «Հայաստանի ողջ պետական-քաղաքական համակարգը, լրատվական, վերլուծական դաշտը գտնվում է Միացյալ Նահանգների ազդեցության ներքո, դա համար մեկ աշխարհակալ ուժի գործիքն է: Ռուսաստանը փորձում է հակադրվել, դրա համար ԱՄՆ-ը իր բոլոր պռոտեժեներին խորհուրդ է տալիս հաշվի նստել Ռուսաստանի հետ»,- ասաց նա:
Մանուչարյանը համոզված է՝ ազգերի երկխոսության լավագույն լեզուն մշակույթն է, ուստի նա կողմ կլիներ, որ Եվրոպայից մեզ այցելեն մշակույթի նախարարները, և ոչ՝ Ֆյուլեները:
Լուսանկարը՝ PanARMENIAN Photo-ի
