Microsoft-ի ու Yahoo!-ի էլեկտրոնային փոստարկղերը նույնպես ենթարկվել են հարձակման Gmail-ի հետ մեկտեղ: Այս մասին հաղորդել են համակարգիչների համար հակավիրուսային ծրագրեր մշակող Trend Micro ամերիկա-ճապոնական ընկերության ներկայացուցիչները:
Հիշեցնենք, որ հունիսի 2-ին Google-ը տարածել էր հաղորդագրություն, համաձայն որի իր փոստային Gmail ծառայության որոշ հասցեներ ենթարկվել են հաքերական հարձակման չինացիների կողմից: Հետագայում նաև ասվում էր, որ հարձակման թիրախ էին ամերիկացի բարձրաստիճան պաշտոնյաների հասցեները: Չինաստանն այս մեղադրանքները հերքեց:
Ինչպես նշում է France 24 հեռուստաալիքը, հղում կատարելով Trend Micro-ի ներկայացուցիչ Նարթա Վիլնյովին, հենց այդ ժամանակ հարձակման են ենթարկվել նաև Microsoft-ի ու Yahoo!-ի էլեկտրոնային փոստարկղերը: Հաքերներին հետաքրքրել է նամակագրության բովանդակությունը, ինչպես նաև օգտատերերի անձնական տվյալները: