ԱՄՆ դաշնային կառավարության գործունեության ֆինանսավորման մասնակի դադարեցումը, որը տեղի է ունեցել 2014թ. ֆինանսական տարվա հաստատված պետբյուջեի բացակայության պատճառով, ամերիկյան տնտեսությանն արդեն պատճառել է շուրջ 2 միլիարդ դոլարի վնաս: Ինչպես հաղորդում է ITAR-TASS-ը, այս մասին հայտարարել է IHS Global Insight ամերիկյան քոնսալթինգային ընկերությունը:
Ընկերության տվյալներով՝ կառավարության աշխատանքի դադարեցման առաջին վեց օրերին վնասը կազմել է 1.6 միլիարդ դոլար: Այս շաբաթ յուրաքանչյուր օր ԱՄՆ տնտեսությունը կրում է շուրջ 160 միլիոն դոլարի վնաս:
Նվազել է նաև պետական պատվերների ծավալները, որոնք ստանում էին ամերիկյան ընկերությունները: Օրինակ՝ Lockheed Martin օդատիեզերական ընկերությունը երկուշաբթի ստիպված է եղել հարկադիր արձակուրդի ուղարկել շուրջ 2400 աշխատակցի պետական մի շարք նախագծերի իրագործման դադարեցման կապակցությամբ:
Հիշեցնենք, որ հոկտեմբերի 8-ին ԱՄՆ նախագահ Բարաք Օբաման Կոնգրեսին կրկին կոչ է արել վերսկսել կառավարության ֆինանսավորումը և բարձրացնել պետական պարտքի շեմը և հավելել, որ դրանից հետո պատրաստ է խոսել այն ամենի մասին, ինչը անհանգստացնում է հանրապետականներին: Ի պատասխան՝ Կոնգրեսի ներկայացուցիչների պալատի խոսնակ Ջոն Բեյները հայտարարել է, որ կոնգրեսականները չեն բարձրացնի ԱՄՆ պետական պարտքի առաստաղը առանց բանակցությունների:
