ՆԱՏՕ-ն Լիբիայում ապրիլին սկսված գործողությունների ժամանակ առաջին անգամ կիրառել է ռազմական ուղղաթիռներ՝ ռեժիմի ռազմական թիրախները ոչնչացնելու համար: «Այս հարձակման թիրախն էին ռազմական տեխնիկան, սարքավորումները և զինվորական ստորաբաժանումները»,- ասված է Հյուսիսատլանտյան դաշինքի հայտարարության մեջ:
Ինչպես հաղորդում է «Ազատություն» ռադիոկայանը, «Ապաչի» տեսակի ուղղաթիռները գրոհել են Բրեգա քաղաքի առափնյա շրջանները, որոնք համարվում են կարևոր նավթարդյունաբերության տեսակետից:
ՆԱՏՕ-ում ասել են, որ գրոհային ուղղաթիռների կիրառումը ցույց է տվել դրանց արդյունավետությունը և ճկունությունը` Քադաֆիի զորքերին հետապնդելու և նրանց վրա գրոհելու տեսակետից, երբ նրանք թաքնվում են բնակավայրերում: Այս մասին հաղորդում է Reuters գործակալությունը:
Միաժամանակ փորձագետները նշում են, որ ուղղաթիռների օգտագործումը կհանգեցնի ՆԱՏՕ-ի զորքերում մարդկային կորուստների, քանի որ ուղղաթիռներն ավելի խոցելի են, քան ռազմական ինքնաթիռները:
