Ինչպես հաղորդում է Al-Arabia հեռուստաալիքը, երեկ Սիրիայի կենտրոնում` Համա քաղաքում, տեղի է ունեցել բազմահազարանոց հանրահավաք, որին հետևել են իրավապահների հետ բախումներ: Բախումների հետևանքով առնվազն 67 մարդ է զոհվել: Այս մասին հեռուստաալիքին հայտնել է ընդդիմության ներկայացուցիչ Ռամի Աբդ Ալ-Ռահմանը:
SANA պետական լրատվական գործակալությունը երեկոյան հաղորդել էր, որ Համա քաղաքում մի քանի հարյուր մարդ բացականչել են տարբեր կարգախոսներ, սակայն ոստիկանությունը և անվտանգության ծառայության մասնակիցները չեն խոչընդոտել այդ ակցիային: Իսկ բախումները տեղի են ունեցել բանակի ստորաբաժանումների հետ:
Հիշեցնենք, որ մարտից շարունակվող բախումները ավելի ու ավելի դաժանորեն են ճնշվում իշխանությունների կողմից, որոնք, չնայած աշխարհի կողմից ընդունվող բազմաթիվ պատժամիջոցներին, շարունակում են զենք և բռնի ուժ կիրառել ընդդիմության և խաղաղ բնակչության դեմ:
