Գազի ներկրման պայմանագիր գոյություն ունի, այն «Գազպրոմ էքսպորտ» ընկերության հետ է: Այսօր ԱԺ-ում լրագրողների հետ ճեպազրույցի ժամանակ այս մասին տեղեկացրեց ՀՀ էներգետիկայի և բնական պաշարների նախարար Արմեն Մովսիսյանը:
Նրա խոսքով՝ «Գազպրոմը» մեծաթիվ ընկերությունների խումբ է, սակայն կա «Գազպրոմ էքսպորտ» ընկերություն, որը զբաղվում է ՌԴ-ից գազի արտահանմամբ. հենց այդ ընկերության հետ է «ՀայՌուսգազարդ» ընկերության պայմանագիրը: Մովսիսյանի խոսքով՝ այսուհետ ևս հայ սպառողները գազ կստանան 189 դոլարով:
«Ես չեմ լսել, որ Արամ Մանուկյանը վեց ամիս շարունակ ասի՝ պայմանագիրը կնքե՞լ եք, թե՞ չեք կնքել: Ինձ ասաց՝ ե՞րբ է ստորագրվում, ամսաթիվը չէի հիշում, մարդ եմ, կարող եմ ամսաթիվը չհիշել: Հույս ունեմ՝ պայմանագիրը մինչև տարեվերջ կստորագրվի»,- ասաց նա:
Նախարարը նշեց, որ գազի սակագնի շուրջ համաձայնեցման ժամանակ ՄՄ անդամակցման որոշումից զատ՝ այլ պարտավորություն չունեն: Այս որոշմանն իրենք հասել են անգամ մինչ ՄՄ-ին անդամակցելու որոշումը, այն է՝ սակագինը պետք է 30 տոկոսով փոխհատուցվի:
Դիտարկմանը՝ կարո՞ղ ենք ասել, որ ՄՄ մտնելու որոշման առյուծի բաժինը հենց գազի սակագինն է, Մովսիսյանը նշեց, որ նման բան չկա: Նա խորհուրդ տվեց ճիշտ գնահատել մեր տնտեսությունը՝ ինչպիսին է, ինչ արտադրանք կարող է տալ, ինչպիսի շուկայում կարող է մեր արտադրանքը մրցունակ լինել, ինչպիսի տրանսպորտային ճանապարհներով կարող ենք այդ ապրանքները մրցունակ գնով հասցնել շուկա:
«Եթե այս բոլորը քննարկենք, կտեսնենք, որ այստեղ գազը չէ էականը, այլ ամբողջ տնտեսությունը, ի վերջո՝ եթե նայենք մեր արտահանման կառուցվածքը, թե՝ ինչ ենք արտահանում, որ երկրներ, շատ բան պարզ կլինի: Մեր արտադրանքի համար առաջիկա քսան տարիներին լավագույն շուկան ռուսականն է. պետք է սա ճիշտ հաշվի առնենք, հակառակ դեպքում ավելի շատ պրոբլեմներ կունենանք, քան այն, ինչ կունենանք այլ շուկաների հետ աշխատելու դեպքում»,- ասաց նա:
Նախարարը նշեց, որ տրանսպորտային փոխադրման համար կընտրվի երկաթուղին, մյուս ճանապարհները շատ ավելի թանկ արժեն: Այս ճանապարհով մեր տրանսպորտային խնդիրները լուծելու հարցում մեծ աշխատանք պետք է կատարի Ռուսաստանը, բարի կամք պետք է ցուցաբերեն վրացի գործընկերները: Սա միայն Հայաստանի կամքով լուծելի խնդիր չէ. պետք են ժամանակ, աշխատանք, հարաբերություններ, այնպիսի վիճակ, որ այս խնդրի լուծումը բոլորը ցանկանան:
«Կարծում եմ՝ մենք այդ ճանապարհի վրա ենք: Էներգետիկ անվտանգության տեսակետից իրանական գազն այլընտրանքային հնարավորություն է, սակայն ոչ՝ կոմերցիոն տեսակետից: Իրանական գազն ավելի թանկ է, թվային տարբերությամբ՝ մոտավորապես 150 դոլար, գուցեև ավելի թանկ»,- ասաց նա:
