Մոտ 5000 ամերիկացի զինծառայողներ, քաղաքացիական ծառայողներ և նրանց ընտանիքի անդամներ տարհանվում են Ֆլորիդայից հարավ գտնվող «Քի-Ուեսթ» ռազմածովային ավիացիայի բազայից՝ «Իրմա» փոթորկի մոտենալու պատճառով։ Այս մասին հայտնում է CNN հեռուստաալիքը։
Բազայում կմնան մոտ 50-60 անձիք՝ անհետաձգելի աշխատանքների իրականացման համար։
Բացի այդ, տարհանում կարող է իրականացվել նաև տարածաշրջանի այլ ռազմական օբյեկտներում։ Միաժամանակ իրականացվում է մի շարք նավերի, սուզանավերի ու ինքնաթիռների վերաբազավորում։
Ռազմածովայի ուժերի ներկայացուցիչ Բիլ Դոգերտին հայտնել է, որ Կուբայում գտնվող Գուանտանամո ռազմաբազան չի տարհանվի, ինչպես և բազայի բանտում պահվող 41 կալանավորները։
Ավելի վաղ ԱՄՆ նախագահ Դոնալդ Թրամփն արտակարգ դրության ռեժիմ էր հայտարարել Ֆլորիդայում և Պուերտո Ռիկոյի և Վիրջինյան կղզիների ամերիկյան անդրծովյա տարածքներում՝ կապված «Իրմա» փոթորկի մոտենալու հետ։
«Իրմա» փոթորիկն արդեն հասել էր 5-րդ՝ առավելագույն կատեգորիայի, այն անվանում են ամենահզոր փոթորիկն Ատլանտիկայում առնվազն վերջին տասնամյակում։ Այն ուժեղ է «Հարվի» փոթորկից, որն օգոստոսի վերջին հարվածել էր Տեխասի ափին և հանգեցրել աղետալի ջրհեղեղի։
