Վենեսուելայի ԱԳՆ-ը բողոքի նոտա է հղել Իսպանիայի, Մեծ Բրիտանիայի, Իտալիայի և Գերմանիայի դեսպաններին՝ կապված նրանց կողմից ընդդիմադիր Լեոպոլդո Լոպեսի ակտիվիստ կնոջն աջակցելու հետ։ Այս մասին հայտնում է RIA Novosti-ն։
Լիլիան Տինտորին սեպտեմբերի 2-ին չէր կարողացել ուղևորվել արտերկիր, նա դատարան էր կանչվել՝ կապված նրա մեքենայում ավելի վաղ հայտնաբերված խոշոր գումարի հետ։
Տինտորին պատրաստվում էր Եվրոպա ուղևորվել՝ հանդիպելու այդ թվում Ֆրանսիայի նախագահ Էմանուել Մակրոնի, Գերմանիայի կանցլեր Անգելա Մերկելի, Մեծ Բրիտանիայի վարչապետ Թերեզա Մեյի և Իսպանիայի վարչապետ Մարիանո Ռախոյի հետ։
Վենեսուելայի ԱԳՆ-ում նշել են, որ այդ երկրների դեսպաններն ուղեկցել են Տինտորիին օդանավակայան, որտեղից նա պետք է ուղևորվել Եվրոպա։
«Մենք այդ դեպաններին ուղարկում ենք վճռական և համոզիչ բողոքի նոտա՝ Վենեսուելայում նրանց միջամտության, արարքների համար։ Հայտնում ենք դեսպաններին, որ նրանք օգտագործվել են տիկին Տինտորիի կողմից»,-ասվում է ԱԳՆ հայտարարությունում։
Լեոպոլդո Լոպեսը դատապարտվել էր 14 տարվա բանտարկության։ Նա պատասխանատու է ճանաչվել 2014 թվականի զանգվածային ցույցերի համար, որոնց զոհն է դարձել ավելի քան 40 մարդ։ Նա պատիժը կրում է տնային կալանքի տակ։
