Հոկտեմբերի 3-ին Լիբանանում ՀՀ դեսպանությունում տեղի ունեցավ «Մովսես Խորենացու» մեդալի հանձնման հանդիսավոր արարողություն հայ մամուլի վաստակաշատ ներկայացուցիչներ Սանդուխտ Պերթիզլյանին (Շահանդուխտ, Լիբանան) և Նորա Արիսյանին (Սիրիա): Հանդիսությանը ներկա են եղել մտավորականներ, մամուլի, մշակույթի և այլ կառույցների ներկայացուցիչներ:
Բացման խոսքում Լիբանանում ՀՀ դեսպան Աշոտ Քոչարյանը նշել է, որ ՀՀ ղեկավարությունը բարձր է գնահատում մեր հայրենակիցների արժանիքներն ու ավանդը հայապահպանման առաքելության համար:
Դեսպանը շեշտել է համազգային հիմնահարցերում միասնական լինելու կարևորությունը և համոզմունք հայտնեց, որ Հայաստանի Հանրապետության, Արցախի և սփյուռքի միասնական կամքով և ներուժով հնարավոր կլինի հաղթահարել բոլոր մարտահրավերները:
Այնուհետև լրագրող Լորիկ Սապունջյան-Ծատուրյանը ներկայացրեց պարգևատրվածների կենսագրական տվյալները, որից հետո դեսպան Քոչարյանն ընթերցել է ՀՀ Նախագահ Սերժ Սարգսյանի հրամանագիրը և հանձնեց մեդալները:
Սանդուխտ Պերթիզլյանը (Շահանդուխտը) և Նորա Արիսյանն իրենց խորին երախտագիտությունն են հայտնել ՀՀ Նախագահ Սերժ Սարգսյանին` բարձր պարգևի համար: Պարգևատրվածներն իրենց շնորհակալությունը փոխանցել են նաև ՀՀ սփյուռքի նախարարին և Լիբանանում ՀՀ դեսպանությանը:
