Փախստականների բաշխումը ԵՄ երկրների միջև պետք է լինի ավելի արդար, և Գերմանիան պետք է ավելի ակտիվորեն ընդունի փախստականներին՝ հայտարարել է Եվրախորհրդարանի ղեկավար Մարտին Շուլցը: Այս մասին փոխանցում է Bild թերթը:
Փախստականների խնդրի շուրջ քննարկումները և այդ հարցով միասնական եվրոպական քաղաքականության մշակումը նոր թափով է բռնկվել ԵՄ-ում ողբերգությունից հետո, որը տեղի էր ունեցել անցած շաբաթ իտալական Լամպեդուզա կղզու մոտ:
Հոկտեմբերի 3-ին կղզուց ոչ հեռու հրդեհվել էր Սոմալիից մոտ 500 փախստականի տեղափոխող նավը: Հաղորդվում է, որ վթարի պատճառ է հանդիսացել տախտակամածին վառված խարույկը, որի միջոցով փախստականները փորձել են ուշադրություն գրավել: Մինչ օրս հայտնաբերվել է 160 դի: Չի բացառվում, որ ողբերգության զոհերի ընդհանուր թիվը կարող է հասնել 300-ի:
Փախստականների խնդիրն ակտիվորեն քննարկվում է Գերմանիայում նաև սիրիական ճգմաժամի համատեքստում: Գերմանիայի իշխանությունները հավաստում են, որ երկիրն այդ հարցում առանց այն էլ անում է ավելի, քան ԵՄ մյուս երկրների մեծ մասը: 2011 թվականից Գերմանիայում ապաստան է գտնել ավելի քան 18 հազար սիրիացի փախստական: Վերջերս երկրի իշխանությունները սկսել են հավելյալ 5000 մարդու տարհանել Սիրիայից:
Ինչպես ավելի վաղ հայտնել էր Գերմանիայի կառավարության մամլո քարտուղար Շտեֆեն Զայբերտը, Գերմանիան և Շվեդիան միասին ընդունել են ԵՄ հասած սիրիացի փախստականների 2/3-ին: Նա կոչ էր արել ԵՄ մյուս անդամներին՝ ավելի ակտիվորեն մասնակցել փախստականների տեղաբաշխմանը:
