Այսօր Վաշինգթոնի Քարնեգի հիմնադրամում քննարկում է տեղի ունեցել՝ նվիրված Հայաստանի ներքաղաքական իրավիճակին, տեղեկացնում է «Ազատություն» ռ/կ-ն:
Քարնեգի հիմնադրամի Կովկասի հարցերով փորձագետ Թոմաս դե Վաալը, ով վարում էր հանդիպումը, ասել է, որ բազմաթիվ քննարկումներ մինչ այս եղել են՝ հիմնականում նվիրված Կովկասյան տարածաշրջանում արտաքին քաղաքականության հարցերին եւ ԼՂ հակամարտության խնդրին, սակայն զուտ Հայաստանի ներքաղաքական իրադրության քննարկում առաջին անգամն է կազմակերպվում:
Քննարկմանը մասնակցել են Մեծ Բրիտանիայի հեղինակավոր փորձագիտական կենտրոններից մեկի՝ Foreign Policy Center-ի փորձագետ Ադամ Հագը, ում ղեկավարած փորձագիտական խումբը այս տարվա մարտին Հայաստանին վերաբերող զեկույց էր ներկայացրել, Վաշինգտոնի National Democratic Institute-ի Եվրասիայի գծով տնօրեն Լորա Ջութը, Ամերիկյան իրավաբանների ասոցիացիայի անդամ, Հայաստանի գծով տնօրեն Դոն Շաքը, Հայաստանում ԱՄՆ-ի նախկին դեսպան Ջոն Էվանսը:
Լորա Ջութը կարծիք է հայտնել, որ վերջին մի քանի շաբաթների իրադարձությունները շատ նշանակալի, շատ դրական եւ ողջունելի են. բանտարկյալների ազատ արձակումը, մարտի 1-ի իրադարձությունների հետաքննությունը վերսկսելը, Ազատության հրապարակում հավաքները թույլատրելը եւ ներքին երկխոսության խոստումը շատ կարեւոր իրադարձություններ են:
Սակայն Ջութին հետաքրքրում են այս փոփոխությունների դրդապատճառները՝ արդյո՞ք սա միայն մարտավարական հնարք է, որ թույլ է տալիս կառավարությանը «բաց թողնել գոլորշին» եւ թուլացնել լարվածությունը, իսկ ընդդիմությանը՝ ավելի շատ նախարարական պաշտոններ եւ տեղեր ստանալ խորհրդարանում, թե՞ սա իրենից ներկայացնում է ավելի նշանակալի փոփոխություն դեպի ազատականացում եւ ժողովրդավարություն:
Իր խոսքի վերջում Ջութը եզրակացրել է. «Բանտարկյալների ազատ արձակումը եւ հավաքները թույլ տալը, թվում է, սխալ տեքստի շտկում է, սակայն երբ մենք հետ ենք նայում՝ տեսնում ենք, որ սա կարծես թե հիմնավորապես նոր տեքստ է, եւ Հայաստանը սկսել է նշանակալի ժողովրդավարական բարեփոխումների գործընթաց»:
Դոն Շաքն իր ելույթում անդրադարձել է Հայաստանի օրենսդրական, իրավական խնդիրներին եւ մեջբերել Ադամ Հագի վերջին՝«Հայաստանը լուսարձակի տակ» զեկույցից այն միտքը, որ կոռումպացված արդարադատությունը Հայաստանի զարգացման ամենամեծ խոչընդոտներից է, ապա եզրակացրել. – «Դժվար է գերագնահատել մարտի 1-ի իրադարձությունների ազդեցությունը Հայաստանի արդարադատության եւ մարդկանց կողմից արդարադատության ընկալման վրա: Ավելի քան 93 գործեր, որ լայնորեն լուսաբանվել են, ընկալվել են որպես քաղաքական շոու, այլ ոչ թե արդար դատավարություն, եւ այդ շարունակվող տպավորությունը մեծապես ազդել է մարդկանց կողմից արդարադատության ընկալման վրա: Մենք հույս ունենք, որ վերջին զարգացումները կկոտրեն այդ արդեն ձեւավորված կարծրատիպը մարդկանց մոտ»:
Ջոն Էվանսն ասել է, որ այն, ինչ տեղի է ունենում Հայաստանում, էվոլյուցիա է՝ զարգացում, այլ ոչ ռեվոլյուցիա՝ հեղափոխություն: «Ինչ ենք տեսնում. իմ կարծիքով՝ տեղի է ունենում այն, ինչ մենք միշտ ասել ենք, որ ցանկանում ենք տեսնել՝ սա էվոլյուցիա է, ոչ ռեվոլյուցիա», – հայտարարել է Հայաստանում ԱՄՆ-ի նախկին դեսպանը:
