Մարտի 1-ի զոհերից Տիգրան Խաչատրյանի մայրը՝ Ալլա Հովհաննիսյանը, ով բավական ժամանակ է հաստատվել է եվրոպական երկրներից մեկում, այնտեղ քաղաքական ապաստան է ստացել: «Առաջին լրատվական»-ը կապ հաստատեց Ալլա Հովհաննիսյանի հետ: Նա բազմիցս է խոսել երկրում տիրող մթնոլորտի, Մարտի 1-ի զոհերի արյան գնով իշխանության եկած ղեկավարության անօրինությունների, Մարտի 1-ի չբացահայտված ոճրագործության մասին, և ամենայն հավանականությամբ հենց այդ ամենն էլ Ալլա Հովհաննիսյանին ստիպեցին հեռանալ երկրից: Նա մեզ հետ զրույցում ասաց, որ իր ընտանիքի անձնական հարցերին այլևս չի ցանկանում անդրադառնալ: Միայն նշեց, որ հիմա, երբ արդեն ՀՀ իշխանություններն անվստահելի գործընկեր դարձան ԵՄ համար, միգուցե ԵՄ-ն այսուհետ ավելի օբյեկտիվ գնահատի Մարտի 1-ի էջը:
«Ճիշտն ասած, ես կողմ եմ, որպեսզի Հայաստանը ստորագրի ԱՀ, ես կողմ եմ Եվրոպային, բոլորն էլ ժողովրդավարություն են ուզում: Հիմա թող Եվրոպան իմանա, որ ՀՀ իշխանություններն իրենց խոսքերի համար պատասխանատու չեն, իրենց խոսքն ու գործը չեն համապատասխանում իրար: Ներկայումս եվրոպացիները մեզ կհասկանան, որովհետև մենք իրենց շատ էինք ասում, թե սուտ են Մարտի 1-ի բացահայտման իշխանությունների խոստումները: Նրանք իրենց խոսքերի համար պատասխանատու չեն»,- ասաց Ալլա Հովհաննիսյանը՝ շարունակելով, որ Եվրոպան, հավատալով ՀՀ իշխանություններին, աչք էր փակում Մարտի 1-ի էջի վրա:
Նրա կարծիքով` այն բանից հետո, երբ ՀՀ իշխանությունները որոշում կայացրեցին միանալ ՄՄ-ին, միգուցե Եվրոպայի վերաբերմունքը Մարտի 1-ի և ՀՀ իշխանությունների նկատմամբ օբյեկտիվ դառնա, և Եվրոպան դադարի աչք փակել:
