ՀՀ ԱԺ նախագահ Արա Բաբլոյանը օգոստոսի 31-ին ընդունել է Բոսնիա և Հերցեգովինայի արտաքին գործերի նախարար Իգոր Ցրնադակին: Այս մասին հայտնում են ՀՀ ԱԺ մամուլի ծառայությունից:
Ողջունելով նախարարին ՀՀ Ազգային ժողովում՝ Արա Բաբլոյանը նշել է, որ Հայաստանը հետաքրքրված է Բալկանյան երկրների հետ հարաբերությունների սերտացմամբ, սակայն Բոսնիա և Հերցեգովինայի հետ համագործակցությունն այսօր բավարար մակարդակի վրա չէ: ՀՀ ԱԺ նախագահը հույս է հայտնել, որ արտաքին գործերի նախարարի այցը կակտիվացնի միջպետական երկխոսությունը:
Արա Բաբլոյանը, կարևորելով երկու երկրների միջև միջխորհրդարանական կապերի հաստատումը, նշել է, որ ՀՀ Ազգային ժողովում առաջիկայում կքննարկվի Հայաստան-Բոսնիա և Հերցեգովինա բարեկամական խմբի ստեղծման հարցը:
ՀՀ ԱԺ նախագահն անդրադարձել է նաև միջազգային ատյաններում և խորհրդարանական հարթակներում երկու երկրների համագործակցության և պատվիրակությունների միջև կառուցողական ու փոխշահավետ երկխոսության հնարավորությանը:
Անդրադառնալով տարածաշրջանային խնդիրներին և Հայաստանի արտաքին քաղաքականության առաջնահերթություններին՝ Արա Բաբլոյանը փաստել է, որ ԼՂ հակամարտության կարգավորումը Հայաստանը տեսնում է միմիայն ԵԱՀԿ Մինսկի խմբի ձևաչափում:
ՀՀ ԱԺ նախագահն իր խոսքում նշել է. «Հավասարապես ցավում եմ երկու կողմերի կորուստների համար, որոնք անիմաստ են, քանի որ դեռ չկա դիվանագիտական լուծում: Հայաստանը ձգտում է տարածաշրջանում հաստատել և պահպանել բարիդրացիական հարաբերություններ»:
Բոսնիա և Հերցեգովինայի արտաքին գործերի նախարարն Արա Բաբլոյանին ներկայացրել է իր երկրի խորհրդարանի և կառավարության կառուցվածքը, պետական կառավարման մարմինների գործունեության առանձնահատկությունները:
Կարևորելով հարաբերությունները տարածաշրջանում՝ Իգոր Ցրնադակն անդրադարձել է իր երկրում քառամյա պատերազմից հետո խաղաղության և քաղաքական հավասարակշռության հաստատմանը:
Նախարարը, ընդգծելով երկու երկրների համար էլ հարևանների հետ հարաբերությունների ամրապնդման կարևորությունը, նշել է. «Մենք գիտենք, թե ինչ է հակամարտությունը, և մեր սկզբունքն ունենք ԼՂ հակամարտության վերաբերյալ՝ աջակցել ԵԱՀԿ Մինսկի խմբի ջանքերին: Հուսով ենք, որ այդ հարցի լուծումը կբխի երկու երկրների, ինչպես նաև տարածաշրջանի շահերից»:
Հանդիպման ավարտին զրուցակիցներն անդրադարձել են երկու երկրների միջև համագործակցության հեռանկարներին, ԵՄ-ի հետ հարաբերությունների հետագա զարգացմանը և միջխորհրդարանական կապերի ակտիվացմանն առնչվող հարցերին:
