«Ժառանգություն» խմբակցության պատգամավոր Զարուհի Փոստանջյանին օդանավակայանում դիմավորելու էր եկել «Բարև Երևան» դաշինքի ավագանու անդամ Արթուր Գասպարյանը:
Նա «Առաջին լրատվական»-ի հետ զրույցում ասաց, որ ԵԽԽՎ-ում Զ. Փոստանջյանի ելույթը նպատակահարմար չի համարում մեկնաբանել, բայց օդանավակայան գալու նպատակը Փոստանջյանին համերաշխություն հայտնելն է. «Համոզված եմ, որ Ստրասբուրգում Զարուհու ասած ամեն բառի տակ ՀՀ քաղաքացիների 90 տոկոսը կստորագրեր»:
Մեր հարցին՝ արդյոք ԵԽԽՎ-ն նման հարց տալու համար հարմա՞ր ամբիոն էր, մեր զրուցակիցը պատասխանեց. «Ես հավաստիացնում եմ, որ երկրի ներսում բարձրացվել և շարունակելու են բարձրացվել այդօրինակ հարցեր: ԵԽԽՎ-ում կատարվածը հետևանք էր այն տոտալիտար համակարգի, որ ստեղծվել է Հայաստանում»:
Նա հավելեց, որ իշխանությունն այնքան համարձակություն չունի, որ իր հաստիքային երիտասարդությանը լոլիկով և ձվով ուղարկի օդանավակայան. «Լոլիկ ու ձու ունեն, թող տան սոված մարդկանց՝ սնվեն:
Եվ հետո՝ լոլիկն ու ձուն իրենց երեսին վաղուց է հասարակությունը շպրտել, թող իրենց պահեն այդ լխկած լոլիկն ու հոտած ձուն»,-եզրափակեց նա:
