«Այսօր ամբողջ աշխարհում շատ լուրջ է դրված իրավապաշտպանների պաշտպանության հարցը, և կոնկրետ Հայաստանի պարագայում սա ամենաքննարկվող հարցերից մեկն է։ Նման ձևով շարունակելու դեպքում մենք կհավասարվենք Ադրբեջանի, Բելառուսի ու Ղազախստանի մակարդակին՝ այն առումով, թե ինչպես են այնտեղ վարվում փաստաբանների հետ։ Մեր իշխանությունները, և ոչ միայն իշխանությունները, մեծ քայլերով այսօր մեզ տանում են դեպի այդ շատ բացասական իրավիճակին»,- «Առաջին լրատվական»-ի հետ զրույցում նշեց փաստաբան Նինա Կարապետյանցը՝ անդրադառնալով սեպտեմբերի 13-ին փաստաբանների կողմից իրականացվելիք գործադուլին։
Վերջինիս խոսքով՝ այստեղ խնդիրը միայն այն չէ, որ դատական դեպարտամենտի ներկայացուցիչների կողմից փորձ է կատարվում ներխուժել փաստաբանական գաղտնիություն պարունակող տիրույթ, այլ առկա է նաև որոշ փաստաբանների թիրախավորելու հարց։
«Արգելված իրերի ցանկի բացակայության պարագայում շատ հնարավոր է, որ վաղը ոչ ցանկալի փաստաբանին ասեն, օրինակ, քո հեռախոսն ինձ համար արգելված իր է, որովհետև իր քաշը նախատեսվածից ավելի է, ո՞նց կարող է այսպիսի բան լինել, այսինքն՝ դատավարության մասնակցին կամայականորեն ասել, թե ինչ նա կարող է տանել դատական դահլիճ, ինչը չի կարող. դա անգամ տրամաբանությունից դուրս է։
Կան մարտաձևեր, որտեղ մարդու մատը զենք է, որովհետև նա կարող է դրանով աչք հանել. հիմա ի՞նչ, մեզ վաղը պետք է ասեն՝ փաստաբան, արի մատներդ կտրե՞նք, որովհետև դու դրանով կարող ես աչք հանել, իսկ Փաստաբանների պալատն էլ որպես լավություն մեզ կառաջարկի էժան գներով պրոթեզներ դնենք մատների փոխարեն: Արգելված իրերի ցուցակի բացակայությունը բերելու է նրան, որ կկարողանան կոնկրետ թիրախավորել որոշ փաստաբանների և նրանց կփորձեն ինչ-որ գործերից հեռացնել ու թույլ չտալ, որպեսզի նրանք դատերին մասնակցեն, իսկ բոլորս էլ գիտենք, որ եթե երեք անգամ չմասնակցեն, ապա այդ փաստաբաններին վարույթից կհեռացնեն և հետո արդեն բոլորիս ծանոթ սխեմայով կաշխատեն»,- հավելեց փաստաբանը։
Հիշեցնենք, որ սեպտեմբերի 13-ին մի խումբ փաստաբաններ գործադուլ են իրականացնելու ընդդեմ դատական կարգադրիչների զննությունների կամ իրենց իսկ բնորոշմամբ՝ ապօրինի խուզարկությունների։ Այս կապակցությամբ նրանք համատեղ հայտարարություն են տարածել, որին այս պահի դրությամբ միացել է դեռևս 154 փաստաբան։
Մանրամասները՝ տեսանյութում։
