Տեր Տիրայր ավագ քահանա Սահրադյանի համոզմամբ՝ մեր ընտանիքներ են սողոսկել եվրոպական ավանդույթներ, և մենք կորցրել ենք ավանդական հայ ընտանիքի գաղափարը: Նա այսօր լրագրողների հետ հանդիպմանը ասաց, որ ազգային սովորությունները, գեղեցիկ ավանդույթները գրեթե չեն պահպանվել հայ ընտանիքներում, սակայն դրանք ազգապահպանման հիմնական միջոցներն են:
Խոսելով պսակադրությունների մասին` նա ասաց, որ այսօր կաթոլիկ եկեղեցիների նման կատարվող պսակադրությունները, երբ հայրն է բերում աղջկան եկեղեցի, հայ առաքելական եկեղեցին չի ընդունում, սակայն երիտասարդների մեջ միտում կա՝ այդ ձևով ամուսնանալ: Նա նաև քննադատեց երիտասարդներին այն բանի համար, որ մի քանի տարի իրար հետ ընկերություն են անում, նոր են որոշում՝ ամուսնանալ, թե ոչ. «Այժմվա ընտանիքները շատ են տարբերվում առաջվա ընտանիքներից: Հիմա տասը տարի ման են գալիս, նոր ամուսնանում, մի երեխա ունենում, որն էլ հիվանդություններ է ունենում»:
Ասուլիսի մյուս բանախոս, ազգագրագետ Ռաֆայել Նահապետյանն էլ հավելեց, որ շատ ավանդույթներ չիմացության արդյունքում չեն պահպանվում. «Անցյալում աղջիկներն ու տղաները դաստիարակվում էին ընտանիքի, ազգուտակի նկատմամբ պարտավորվածությամբ, հայ կինը աշխարհի ժողովուրդներից տարբերվում է նրանով, որ իրեն նվիրում է ընտանիքին, ազգին ու զավակներին: Եթե այդպիսի դաստիարակություն չլիներ, հայ ազգը այսքան չէր գոյատևի»:
Նրա հավաստմամբ՝ ազգը պահելու համար պետք է պահել ընտանիքի բարոյական դիմագիծը: Այժմ, սոցիալ-տնտեսական, քաղաքական հիմքով պայմանավորված՝ բարքեր կան, որոնք ընդունելի չեն:
Ասուլիսին ներկա էր նաև հայ խոհարարական զարգացման ՀԿ նախագահ Սեդրակ Մամուլյանը, ով ասաց, որ մարդը իր ֆիզիկական և հոգևոր դաստիարակությունը ստանում է առաջինը սննդի միջոցով, իսկ այսօր հայ ընտանիքներում ավանդական ուտեստներ գրեթե չկան:
Հարսանյաց արարողությունների մասին խոսելով` ասաց, որ ավանդական հարսանիքները տևել են երեք օր: Առաջին օրը ցուլ կամ գառ են մատաղ արել, որի արյունից քսել են փեսայի ճակատին, դանակ են թաթախել կենդանու արյան մեջ և այդպես կախել ինչ-որ տեղ. «Աղջիկը, հոր տնից դուրս գալիս համբուրում էր թոնրի շուրթը, իսկ թոնիրը արևի խորհուրդն ուներ գետնի մեջ»:
Բացի այդ, ծիսական ուտեստներ էին պատրաստում, հատկապես հայտնի էր կոլոլոկը, որը տիպիկ հայկական ուտեստ է, բայց թուրքերենով ավելի շատ հայտնի է քուֆթա անունով:
