Գերմանիայի Սահմանադրության պահպանման դաշնային գերատեսչության (հակահետախուզություն) ղեկավար Հանս-Գեորգ Մասենը հայտարարել է, որ ռուսական հատուկ ծառայությունները բարձր ակտիվություն են դրսևորում Գերմանիայում և կարող են փորձել ազդել Բունդեսթագի ընտրությունների արդյունքների վրա։ Այս մասին պաշտոնյան պատմել է Die Welt-ի հետ հարցազրույցում։
Մասենի խոսքով՝ Մոսկվան կարող է կիբերհարձակումների օգնությամբ ապատեղեկատվական արշավ կազմակերպել՝ կապված առաջիկա խորհրդարանական ընտրությունների հետ։
«Գրեթե անհնարին է, որ հակահետախուզությունն իրավաբանորեն կարողանա ապացուցել, որ Ռուսաստանն է կանգնած այդ ցանցահենային հարձակումների հետևում։ Նման սցենարի հավանականությունը բարձր է»,-հայտարարել է Մասենը։
Նա հավելել է, որ ռուսական հետախուզության գործունեությունը Գերմանիայի տարածքում շատ ինտենսիվ է։
Բունդեսթագի ընտրությունները կանցկացվեն սեպտեմբերի 24-ին։
