Ermeni Haber կայքի փոխանցմամբ, թուրք պաշտոնաթող դիվիզիոնային ծովակալ (հատուկ կոչում Թուրքիայի ռազմածովային ուժերում) Իլքեր Գյուվենն իր կնոջ՝ Սունահանըմ Գյուվենի հետ ամուսնալուծվելու համար դիմել է Անկարայի 9-րդ ընտանեկան դատարան։
Սունահանըմ Գյուվենն իր ամուսնու դրդապատճառների մասին դատարանում պատմել է հետևյալը. «Ամուսինս կարծում է, որ ես հայ եմ, և որ ծնողներս ծնվել են Երևանում։ Բացի այդ, նա նշում է, թե որդիս թմրանյութ է օգտագործում։
Դրա համար էլ նա ցանկանում է ամուսնալուծվել։ Նա կարծում է, թե ես այդ ամենը թաքցրել եմ իրենից, սակայն ես մուսուլման եմ»։
Սունահանըմը, դժգոհելով դատավարության ընթացքից, պատրաստակամություն է հայտնել դիմելու Մարդու իրավունքների եվրոպական դատարան (ՄԻԵԴ)։
Փաստորեն, այս դեպքը հերթական անգամ ապացուցում է, որ Թուրքիայում շարունակում են հայ լինելը կամ հայկական ծագում ունենալը որակել որպես «վիրավորանք»։
