Փարիզում բնակվող կնոջ հանդեպ ներկայացվել է մեղադրանք, որի համաձայն՝ նա փորձել է կապ հաստատել «Ալ-Քաիդա» ահաբեկչական կազմակերպության ներկայացուցիչների հետ և առաջարկել է նրանց թիրախներ՝ իր քաղաքում ահաբեկչություններ իրականացնելու համար: Այս մասին հաղորդում է Europe 1. հեռուստաալիքը:
21-ամյա փարիզուհին, ում մամուլն անվանում է միայն անունով՝ Սառա, տարված է ծայրահեղական իսլամի գաղափարներով: Հետաքննության տվյալներով՝ 2012թ. նա գրել է Արաբական թերակղզու «Ալ-Քաիդա»-ի ներկայացուցիչներին, սակայն այդպես էլ պատասխան չի ստացել:
Խուզարկության ընթացքում մեղադրյալի մոտ հայտնաբերվել են ապացույցներ առ այն, որ նա ծայրահեղական կայքերի հատուկ ծածկագրեր է ունեցել: Բացի այդ, նա ընթերցել է Inspire իսլամիստական առցանց ամսագիրը, որի հետևում, ենթադրաբար, կանգնած է «Ալ-Քաիդա»-ն:
Կինը ձերբակալվել է հոկտեմբերի 1-ին, սակայն այդ ժամանակ կասկածանքների բնույթի մասին մանրամասներ չեն հրապարակվել: Փետրվարին Սառան ձերբակալվել է մեկ այլ գործով: Այդ ժամանակ նա իբր հանդիպել է իսլամիստների հետ, որոնք կասկածվում էին այն բանում, որ նրանք ջիհադականներ են հավաքում՝ Ինդոնեզիա ուղարկելու համար: Այդ ժամանակ ոստիկանությունը կնոջն ազատ է արձակել՝ առանց մեղադրանք ներկայացնելու:
