Այս պահի դրությամբ, շուրջ 11 հազար գյուղացիական տնտեսությունների տրամադրվել է 7.5 մլրդ դրամի՝ պետության կողմից սուբսիդավորվող գյուղատնտեսական վարկ։ Այս մասին այսօր լրագրողների հետ ճեպազրույցի ժամանակ հայտարարեց գյուղատնտեսության նախարար Սերգո Կարապետյանը։
«Մենք միշտ տրամադրում ենք, և գործընթացը այս պահին էլ շարունակվում է։ Բայց քանի որ գարնան գյուղատնեսական աշխատանքների հետ կապված է հիմնականում գյուղացիական տնտեսություններում վարկի պահանջարկը մեծանում, իսկ գարնան գյուղատնտեսական աշխատանքները առաջիկա 10-15 օրում կավարտվեն, մեկ էլ աշնանը որոշ պահանջարկ կմնա այդ վարկերի նկատմամբ, այդ ժամանակ էլ կտրամադրվեն վարկեր։ Բերքահավաքի ժամանակ, մթերումների ժամանակ մարդիկ այդ վարկի պահանջ չունեն»,- ասաց նախարարը։
Հիշեցնենք, որ կառավարությունը որոշել էր սուբսիդավորել գյուղացիական վարկերը՝ որոշ առավել աղքատ համայնքներում 6 տոկոսային կետով, իսկ մյուսներում՝ 4 տոկոսային կետով, որի արդյունքում գյուղացիները վարկեր են ստանում առաջին դեպքում 8%-ով, իսկ երկրորդ դեպքում՝ 10%-ով։
