ԱԺ նախկին պատգամավոր, Հանրային խորհրդի անդամ Արշակ Սադոյանը «Առաջին լրատվական»-ի հետ զրույցում նկատեց, որ իշխանության և ընդդիմության միջև ընթացող երկխոսությունը պարզապես իմիտացիա է. «Այս ամենը գեղեցիկ իմիտացիոն պրոցես է և այս իմիտացիայի մեջ նույնիսկ ծիծաղելի են այն թեզերը, որ առաջ են քաշում կողմերը»:
Ըստ Սադոյանի՝ բոլորի համար էլ հասկանալի է, որ արտահերթ ընտրություններ անցկացնելն ուղղակի թեզ է, որն առաջ է քաշվում նրա համար, որպեսզի չստացվի, թե նախկինում ասվածները սուտ են: Նրա գնահատմամբ՝ ներկայիս գործընթացները ցույց են տալիս, որ ամեն ինչ փոխադարձ համաձայնությամբ է իրականանում. «Գնում է ինչ-որ պրոցես, որի արդյունքում իրականում տուժում է մեր ժողովուրդը, որովհետև ևս մեկ անգամ մնում է խաբված»:
Սադոյանը նկատեց, որ ժողովրդի մեջ արդեն իսկ կա հիասթափություն թե՛ իշխանությունից, թե՛ ընդդիմությունից. «Իշխանությունը միշտ ընդունվել է որպես հարկադրիչ ապարատ, և ժողովուրդն իշխանությանը չի ընդունում որպես սիրելի, իսկ ընդդիմությունից հիասթափությունն արդեն մեկ տարուց ավելի է՝ նկատելի է»:
Երկխոսության գործընթացում մյուս քաղաքական ուժերի կարգավիճակին անդրադառնալով՝ Արշակ Սադոյանը նկատեց, որ ինքը համաձայն չէ այն դիտարկումների հետ, թե մյուս ուժերը մարգինալանում են. «Ընդհակառակը, մյուս քաղաքական ուժերն այս պրոցեսում շահում են, որովհետև եթե ժամանակին ՀԱԿ-ն իրեն ներկայացրեց որպես միակ և լուրջ ընդդիմություն, այժմ հասկանալի է, որ դա խաղ էր մյուսներին նսեմացնելու համար: Այս պայմաններում մյուսների շանսերն ավելանում են, ոչ թե պակասում»:
