«Ազգային անվտանգություն» կուսակցության նախագահի Գառնիկ Իսագուլյանի` երեք նախագահներին կլոր սեղանի շուրջ հավաքելու նախաձեռնությունն արդեն արձագանք է ստացել: Երեք նախագահները ստացել են Իսագուլյանի նամակները, և նրանցից մեկի գրասենյակը նույնիսկ արձագանքել է ուղարկված նամակին: Թե ով է արձագանքող նախագահը, Իսագուլյանը չասաց,միայն նշեց, որ «չկա փոխադարձ համաձայնեցում»: «Մոտ օրերս, երբ որ արդեն ձեռք կբերվի փոխադարձ համաձայնեցում և հանդիպման վերջնական օրը կհստակեցվի, կպայմանավորվենք, մենք անպայման լրատվամիջոցներին տեղյակ կպահենք: Այս գործընթացն անպայման զարգացում կունենա, և առաջիկայում անպայման առաջին հանդիպումը կլինի»,- «Առաջին լրատվական»-ի հետ զրույցում ասաց Գառնիկ Իսագուլյանը:
Ի դեպ, նա նաև նշեց, որ իր նախաձեռնությունը միայն երեք նախագահներով չի սահմանափակվում: Նա համագործակցության առաջարկ է անում ոչ միայն Հայաստանի նախագահներին, այլև ԼՂՀ ներկա ու նախկին նախագահներին, ինչպես նաև երկու վեհափառ հայրապետներով:
Գառնիկ Իսագուլյանը չմանրամասնեց, նախագահներին ուղարկված նամակների բովանդակությունը, միայն ասաց, որ երեքին տարբեր բովանդակությամբ` «յուրովի» նամակներ են ուղարկվել: Բովանդակության չհրապարակելն էլ բացատրեց նրանով, որ իրենց խնդիրն առաջին հերթին յուրաքանչյուրի հետ առանձին-առանձին հանդիպելն է և իրենց նպատակը ներկայացնելը. «Երբ որ իրենց կողմից էլ դիրքորոշում կլինի, նոր բոլորին տեղյակ կպահենք»:
Իսագուլյանը հստակեցրեց, որ հանդիպմանը միայն Մաքսային միությանը Հայաստանի անդամակցման հարցը չի քննարկվելու, այլ ազգային ծրագիր է մշակվելու: «Ես առաջարկում եմ մի ֆորմատ, որտեղ քննարկումը կլինի անկաշկանդ, կքննարկվեն հասարակական վիճակի առողջացման տարբերակներ»,- ասաց նա:
«Առաջին լրատվական»-ի տեղեկություններով՝ նամակներն առանձնապես գաղտնիք չեն պարունակում, այնտեղ ընդամենը հիմնավորված է հանդիպման անհրաժեշտությունն ու կարևորությունը: Լրացուցիչ խորհրդավորություն հաղորդելով էլ, ըստ մեզ, փորձ է արվում մեծացնել նախաձեռնության շուրջ հետաքրքրությունը:
Առաջին նախագահ Լևոն Տեր-Պետրոսյանի մամուլի խոսնակ Արման Մուսինյանն «Առաջին լրատվական»-ին փոխանցեց, որ, այո, նամակը ստացել են, բայց թե ինչպես ու երբ կարձագանքեն, չասաց: «Երբ որ կարձագանքենք, դուք դրա մասին կիմանաք»,- եղավ պատասխանը:
Երկրորդ և երրորդ նախագահների խոսնակների հետ կապվել առայժմ չհաջողվեց: Նրանց գրասենյակների արձագանքը կներկայացնենք առաջիկայում:
