Այսօր լրատվամիջոցները կրկին հայտարարել են հաքերական նոր հարձակման մասին, որն իրականացվել է Sony ընկերության կայքի դեմ: Հաքերներն ասել են, որ իրենց հաջողվել է գողանալ մոտ մեկ միլիոն օգտատերերի տվյալներ, որոնց մի մասն արդեն հրապարակել է ինտերնետում: Այս մասին հաղորդում է Reuters գործակալությունը:
Ի տարբերություն նախորդ հարձակման, երբ «ջարդվել էր» Sony PlayStation օնլայն խաղերի կայքը, այս անգամ թիրախը եղել է Sony Pictures Entertainment-ը: Հաքերները հրապարակել են այդ կայքում գրանցված օգտատերերի անուն ազգանունները, ծննդյան թիվը, էլեկտրոնային հասցեն և գաղտնաբառը:
LulzSec հաքերների խումբն ասել է, որ իրենց հաջողվել է հենց առաջին փորձից կոտրել կայքի սերվերը։ «Ինչո՞ւ եք դուք վստահում մի ընկերության, որը թույլ է տալիս հասանելի դարձնել (օգտատերերի տվյալները.- 1in.am) այդքան հեշտ հարձակման դեպքում»,- գրում են հաքերները: