Մաքսային միության շրջանակներում մշակվել են մեխանիզմներ, թե ինչպես պետք է ապրանքներն առանց զննման անցնեն սահմանը: Հայաստանի կառավարությունը ծանոթացել է այդ պրակտիկայի հետ: Հոկտեմբերի 2-ին ԱԺ-ում կառավարության հետ հարցուպատասխանի ժամանակ այս մասին նշեց ՀՀ վարչապետ Տիգրան Սարգսյանը՝ հավելելով, որ դա էապես հեշտացնելու է ապրանքների արտահանումը Հայաստանից դեպի ՄՄ տարածք, ինչպես նաև հեշտացնում է ինտեգրացիոն գործընթացները:
Վարչապետը խոստացավ հետագայում մանրամասն բացատրել՝ ինչ փաստաթղթեր են անհրաժեշտ լինելու, սակայն մեկ-երկու խոսքով նշեց, որ համապատասխան փաստաթղթերը, որ տրվում են ՀՀ-ում, նույն կերպ տրվում են ՄՄ-ի կողմից: Երբ այդ ապրանքը՝ համապատասխան փաստաթղթերով, հայտնվում է ՄՄ տարածքում, այլևս մաքսազերծման անհրաժեշտություն չի լինում, դրանք հեշտությամբ են հատում սահմանը: Տիգրան Սարգսյանի համոզմամբ՝ արտահանողների համար տրանզիտային ծախսերը նվազեցնելու հնարավորություն է ստեղծվում:
